Josh Hartnett var ein skærasta stjarna Hollywood fyrir tveimur áratugum og var beðinn um að leika næsta Batman þegar hann pakkaði saman eigum sínum, flutti úr borg englanna og sagði skilið við sviðsljósið.
Hartnett var á hápunkti ferilsins þegar hann gekk í burtu frá því öllu. Hann var einn eftirsóttasti leikari Hollywood seinni hluta tíunda áratugarins og við upphaf aldamóta eftir að hann kom fram í kvikmyndinni Halloween: H20. Hann lék einnig í The Faculty, Pearl Harbour, Black Hawk Down og fleiri vinsælum myndum.
Honum var síðan boðið draumahlutverk margra leikara, hann var bæði beðinn um að leika Superman, en hafnaði því tvisvar, og Batman. Christian Bale tók hlutverkið í hans stað.
Næsta sem hann gerði var eitthvað sem enginn bjóst við, hann hætti að leika og flutti til Minnesota á heimaslóðir. Hann lék ekkert í tvö ár en fór síðan að leika aftur en í minni mæli og ekki í jafn stórum kvikmyndum.
„Fólk hafði allt of mikinn áhuga á mér og það var óheilbrigt,“ sagði Hartnett um ákvörðun sína að yfirgefa sviðsljósið.
„Það voru nokkur atvik þar sem fólk kom heim til mín, ég lenti í eltihrellum.“
Þegar leikarinn var 27 ára og á hápunkti ferilsins mætti karlmaður á frumsýningu með byssu og sagðist vera faðir Hartnett til að komast nær honum. Maðurinn var í kjölfarið handtekinn.
„Það var margt sem gerðist, þetta var skrýtinn tími […] Ég vildi ekki að vinnan myndi taka yfir líf mitt. Ég sá hvað kom fyrir aðra á þessum tíma og ég vildi ekki lenda í því sama, þannig ég gaf þetta allt upp á bátinn.“
Hartnett er hægt og rólega að koma til baka í sviðsljósið og fer með hlutverk í nýja spennutryllinum Trap.