Á verðlaunaafhendingu Evrópsku kvikmyndahátíðarinnar í Palic í Serbíu í gærkvöldi afhenti formaður dómnefndar, Bettina Broekemper, Rúnari Rúnarssyni verðlaun fyrir bestu leikstjórnina fyrir kvikmyndina Ljósbrot.
„Ljósbrot heillaði okkur ekki aðeins með frábærum leik og hugmyndaríkri notkun myndmáls og hljóðs, heldur einnig með lýsingu á innri sorg í flóknum sambandsaðstæðum. Mjög innileg kvikmynd sem sýnir ástarmissi á blíðlegan og áhrifaríkan hátt. Með mikilli nákvæmni og snörpum stíl, skilur leikstjórinn þig eftir agndofa,“ sagði Broekemper.
Ljósbrot verður frumsýnd hérlendis 28. ‘agúst, í aðalhlutverkum eru Elín Hall, Katla Njálsdóttir, Mikael Kaaber, Baldur Einarsson, Gunnar Kristjánsson og Ágúst Wigum. Rúnar Rúnarsson skrifar handrit myndarinnar og leikstýrir en Heather Millard framleiðir.
Ljósbrot var opnunarmynd á Kvikmyndahátíðinni í Cannes og hlaut myndin standandi lófaklapp áhorfanda í fimm mínutur sem og frábæra dóma kvikmyndagagnrýnenda.
Myndin gerist á fallegum vordegi þegar líf Unu snýst á hliðina á svipstundu og upphefst rússibanaferð tilfinninga. Þar sem mörkin milli hláturs og gráturs, fegurðar og sorgar, verða stundum óskýr.
Í nýrri stiklu sem hefst sem bein útsending frá Hvalfjarðargöngunum hefur mikið mannfall átt sér stað og margra er enn saknað. Í kjölfarið fylgja dúndrandi tónar frá Hr. Hnetusmjöri við glefsur úr myndinni.