Ragnhildur Þórðardóttir, betur þekkt sem Ragga Nagli, segir að það allra besta sem konur geri á samfélagsmiðlum er að fylgja eins breiðu litrófi af fólki. Tekur hún leikkonuna Pamelu Anderson orðum sínum til áréttingar, en Anderson hefur fengið yfir sig holskeflu af neikvæðum athugasemdum eftir að hún fór að koma fram farðalaust nýlega.
„Pamela Anderson gerði garðinn frægan í níunni spígsporandi á ströndum Kaliforníu vopnuð flotholti íklædd örsmáum rauðum sundbol. Barmurinn íturvaxinn með aðstoð sílíkons. Andlitið farðað í fullum skrúða
En nú er Pamela 57 ára gömul og hefur skipt út þéttu sparslinu fyrir laufléttan farða, augnhár og augabrúnir eru náttúrulegar og er ekki að fela hrukkur og ellibletti.
Henni er drull….. og það er ofursvalt,“ segir Ragga í færslu á Facebook-síðu sinni.
„En þessu fylgir kostnaður í formi ljótra athugasemda frá litlum sálum vopnuðum lyklaborði og fela sig bakvið notendanafn á Instagram.
„Ertu 80 ára?“
„Þú þarft eitthvað meiköpp. Ekki mikið. Bara smá.“
„Sorrý en hún þarf allavega maskara til að augun sjáist betur.“
„Djammið með Tommy er greinilega að taka sinn toll.“
„Hún lítur út eins og draugur.“
„Please. Settu á þig augabrúnir.“
„Þyngdarlögmálið er ekki að vinna með þér.“
Þetta er bara brotabrot af neikvæðum athugasemdum sem Pamela fékk yfir sig á nýjasta pósti sínum,“ segir Ragga.
Í athugasemdum við færslu sem Anderson birti 12. júní má sjá fjölda neikvæðra athugasemda um útlit hennar. Vissulega eru margar jákvæðar líka.
View this post on Instagram
Hún segir að myndir af lítt förðuðu andliti séu ferskur andblær í hafsjó af þykkum farða, augnháralengingum, kinnafyllingum, bótoxi, og strekktum smettum. En kaldhæðnin er að þær konur fá einnig yfir sig holskeflu af athugasemdum. Þá eru þær of hégómagjarnar.
„Samkvæmt lyklaborðsriddurum er að sýna aldur sinn, vera óförðuð, með hrukkur eða í yfirþyngd eitthvað sem ætti að draga konur fyrir Alþjóðadómstólinn í Haag.
Þeim er drull hvort þær séu góðar manneskjur, gáfaðar, með falleg gildi, fyndnar og til staðar fyrir fólkið sitt.
Með dýrmæta reynslu til að miðla áfram eða hvað þær hafa afrekað.
Ertu ekki örugglega mjó og falleg?
Þá ertu ókei.“
Ragga bendir á þá einföldu staðreynd að konur eldast eins og restin af mannkyninu… það er lögmál lífsins. „Andlitið segir sögu hvers og eins. Hver hrukka er merki um bros, hlátur, grátur og áhyggjur. Elliblettir eru reynslublettir. Slitför eftir meðgöngu eru ummerki um fallegustu reynslu mannsins.
Ef einhver krumpast yfir sögu þinni þá er það þeirra vandamál, ekki þitt.“
Að lokum segir Ragga að það allra besta sem við konur gerum á samfélagsmiðlum er að fylgja eins breiðu litrófi af fólki og hægt er.
„Konum á öllum aldri.
Eldri konur sem eru ekki útúrfilteraðar.
Konum af öðrum kynþáttum.
Frá öðrum menningarheimum.
Konum í öllum stærðum.
Transkonum.
Allskonar líkömum. Stórir. Litlir. Þybbnir. Grannir. Vöðvaðir.
Ekki bara Hollívúdd Instagram TikTok ofspörsluð filteruð smetti.“
