Á föstudag, hófust í Bandaríkjunum sýningar á Snertingu, mynd Baltasars Kormáks eftir samnefndri skáldsögu Ólafs Jóhanns Ólafssonar. Í aðdraganda frumsýningar hefur myndin hlotið frábæra dóma hjá þarlendum gagnrýnendum. Á vefsíðunni Rotten Tomatoes sem dregur saman umsagnir gagnrýnenda er hún með 95% í einkunn.
Þar á meðal eru fjölmiðlar á borð við New York Times, Wall Street Journal og TIME, fagtímaritin Variety og Hollywood Reporter, ásamt áhrifamiklum netmiðlum á borð við IndieWire, Mashable, Screen Daily og Roger Ebert. Þá segir gagnrýnandi hins áhrifamikla vefmiðils Movieweb í dómi sínum að Snerting (Touch) sé besta mynd sem komið hafi í bíó í Bandaríkjunum það sem af er árinu.
Gagnrýnandi TIME, Stephanie Zacharek, tekur ekki síður djúpt í árinni. „Snerting er mynd leikstjóra sem leyfir sér að láta kylfu ráða kasti og hugsa með hjartanu – og með því fær hann okkur áhorfendur til að trúa því að við getum það líka.“
Í New York Times segir að „nærfærinn leikur og gífurlega áhrifamikil flétta gera Snertingu að sígildri vasaklútamynd – að viðbættri einstaklega næmri útfærslu á ást fólks af ólíkum bakgrunni.“
Roger Ebert hælir Snertingu líka á hvert reipi enda „skíni af henni glæsileikinn.“ Og í Variety segir: „Þegar upp er staðið er Snerting einstaklega áhrifamikil og mannleg mynd um fólk sem endurreisir líf sitt eftir skelfilegan missi með því að vinna bug á sorginni með kjark og ást að vopni. Og það er ekkert sem hefur jafn djúpstæð áhrif á áhorfendur og að verða vitni að því.“
Baltasar er að sjálfsögðu ánægður með viðtökurnar: „Það er ótrúlega gefandi að lesa lof um kvikmyndina og þá sérstaklega þegar verið er að hlaða lofi á samstrfsfólk mitt. Fólki sem hefur gefið allt í þessa mynd og uppsker nú ríkulega. Leikarar, listrænt samstarfólk, tæknimenn og allir aðrir, sem lögðu hönd á plóginn. Nú þegar Snerting er að hefja heimsreisu sína er einnig vert að þakka stjórnvöldum, Kvikmyndamiðstöð Íslands og öllum þeim sem hafa haft trú á íslenskri menningu hér heima og erlendis“
Það er hið þekkta kvikmyndaver Focus Features sem fer með réttinn og dreifinguna á Snertingu í Bandaríkjunum en utan þeirra er Universal Pictures í því hlutverki.
Snerting hefur hlotið mikið lof gagnrýnanda og áhorfanda á Íslandi en hér var hún frumsýnd í maí og er enn sýnd við góða aðsókn í kvikmyndahúsum.