Vinkonurnar og samfélagsmiðlastjörnurnar Sunneva Einarsdóttir og Birta Líf Ólafsdóttir kynna nú nýtt verkefni til sögunnar, ís sem þær hafa sjálfar þróað og hannað í samstarfi við Kjörís.
Um er að ræða Ostakökuís með hindberja swirl og bleiku súkkulaði. Allt er þetta svo skreytt í anda Teboðsins, hlaðvarpsþáttar vinkvennanna, með smekklegum hvítum hjörtum, eins og segir í tilkynningu frá Kjörís.
Ísinn nefna þær Bestís og er það vel við hæfi þar sem þær eru sennilega þekktustu „besties“ landsins, eða bestu vinkonur.
Í tilefni af frumsýningu íssins hafa þær blásið til samfélagsmiðla-stjörnuveislu sem haldin er á háleynilegum stað í hjarta höfuðborgarinnar.
Ísinn verður svo sýndur almenningi á fimmtudagsmorgun í Bónus Smáratorgi og munu fyrstu viðskiptavinirnir fá glaðning frá þeim stöllum. Teboðs-skvísurnar munu svo kynna vöruna á meðan birgðir endast í Bónus Smáratorgi. Stefnt er að því að ísinn verði kominn í allar verslanir landsins í kringum næstu helgi.
Verkefninu fylgja þær svo eftir með ferðalagi um landið þar sem þær munu kynna ísinn í hinum ýmsu bæjarfélögum á fagurlega skreyttum Kjörísbíl í anda Teboðsins.
Þetta er þeirra fyrsta skref í þróun og vöruhönnun en alveg örugglega ekki það síðasta. Hafið augun á þessum stúlkum á komandi árum því hér eru stórstjörnur að stíga sín fyrstu skref í matvælageiranum segja Kjörísmenn sem bera miklar væntingar til þessa samstarfs og eru sannfærðir um að líflegur tími sé fram undan.