Ólafur F. Magnússon, læknir og fyrrverandi borgarstjóri, hefur nú sent frá sér nýtt lag, Sumarkoman, heitir það.
Ólafur segir um þetta lag í stuttu spjalli við DV, og birtir texta lagsins:
„Ég hef ekki gefið út neitt lag síðan í júlí 2022 en þá kom út fjórði geisladiskur minn og þriðja ljóðabókin. Síðan hef ég legið lágt. En á sumardaginn fyrsta kom þetta ljúfa sumarlag til mín og ljóð fæddist um leið, svohljóðandi:
Ég fagna þér mín sumarsól,
er sælu veitir í hjarta mér.
Þú vermir okkar byggð og ból
og bætir landið hvar sem er.
Þú færir okkur þrótt og þor,
þakklát eru konur, menn.
Brátt er liðinn vetur, vor,
vænust tíðin kemur senn.
Því öll við elskum sumartíð,
sem eygló færir þér svo blíð.
Þá birtast munu blóm í hlíð
og betri verður grundin fríð.
Það er Friðrik Grétarsson sem gerir myndbandið en Vilhjálmur Guðjónsson annast útsetningu og hljóðfæraleik. Sjálfur syng ég lag mitt og ljóð. Þetta er 35. lagið sem ég gef út frá því að listagyðjan byrjaði að heimsækja mig árið 2013.“
Lagið má hlýða á í spilaranum hér að neðan: