Tónlistarmennir Herbert Guðmundsson og Patrik Snær Atlason, Prettyboitjokko, gefa þann 5. júlí út lagið Annan hring.
Lagið er eftir þá félaga og Bomarz, Bjarka Ómarsson.
Patrik hafði nýlokið við að koma fram á skemmtun með Herberti fyrr á árinu þegar hann hringdi í pródúsentinn Bjarka Ómarsson, betur þekktur sem Bomarz. Patrik sagði Bjarka frá því að Herbert hefði viðrað þá hugmynd að þeir ættu að gefa út lag saman og við það veðraðist Bjarki allur upp.
„Ég algjörlega ofpeppaðist í þessu símtali og sá þarna gullið tækifæri til að fá útrás fyrir 80´s geðveikina í mér,” segir Bjarki.
Félagarnir fóru beint í stúdíó og var Bjarki staðráðinn í áður en fyrsta nótan í laginu hafði verið sett saman að hafa þar tilvísun í uppáhalds lagið sitt með Hebba: Svaraðu!
„Það er svo mikið 80´s að vitna í gömul textabrot og Svaraðu passaði fullkomlega við lagið okkar og inn í það concept.“
Patrik segir það mikinn heiður að fá eina af goðsögnum íslensks tónlistarlífs til að syngja með sér.
Lagið kemur út á Spotify 5. júlí.