Ein þeirra var Sigríður Guðnadóttir, fyrrverandi mágkona Gunnars. Hún sakaði hann um að hafa áreitt sig kynferðislega þegar hún var fjórtán ára gömul.
Árið 2011 sökuðu fleiri konur hann um kynferðisbrot. Gunnar höfðaði meiðyrðamál gegn tveimur konum vegna ummæla þeirra í Pressunni og voru aðeins 5 ummæli af 21, sem Gunnar krafðist ómerkingar, dæmd ómerk. Var það mat dómsins að frásagnir kvennanna sem báru vitni um kynferðisbrot Gunnars væru trúverðugar.
Sigríður Guðnadóttir, söngkona og fasteignasali, rifjar upp þennan tíma í þættinum Segðu mér á Rás 1.
„Þetta var rosalegt fyrir mig. Ég datt úr vinnu og þorði ekki ein út í búð og mér leið eins og allir væru að horfa á mig,“ segir hún.
Inga, systir Sigríðar, var gift Gunnari. Þáverandi hjónin stofnuðu Krossinn ásamt móður Sigríðar.
Sigríður missti pabba sinn þegar hún var sex ára gömul og segir að eftir það varð Gunnar stór þáttur í hennar lífi.
„Hann var hávær maður sem sagði ýmislegt á opinberum vettvangi sem hinum almenna borgara fannst einkennilegt og skrítið og hann var kannski öfgafullur í sínum skoðunum,“ segir Sigríður.
Sigríður lýsir tímabilinu eftir að hún steig fram árið 2010. Hún fór meðal annars í viðtal í Kastljósi og vakti málið gríðarlega athygli á sínum tíma.
„Þetta var rosalegt fyrir mig […] Þetta var erfitt, þetta var rosalega súrrealískt tímabil. Það tók örugglega átta ár af lífi mínu að gera þetta upp,“ segir hún.
Sigríður á erfitt með að lýsa tilfinningunum og áhrifunum sem þetta hafði á hana og hennar nánustu.
„Þetta [er] allt flókið. Af því ég get alveg sagt um Gunnar að hann gerði ofboðslega mikið af góðum hlutum og mér þykir vænt um hann. Burtséð frá þessu öllu þykir mér vænt um hann,“ segir hún.
„Ég er fyrsta manneskjan til að fyrirgefa fólki og fyrirgef fólki áður en það biður um það. Það hefur aldrei verið erfitt fyrir mig að fyrirgefa en þegar þú kemur fram með svona mál sem átti aldrei að vera opinbert, það var þannig að í raun byrjaði hann og þeir sem voru í kringum hann að fara með þetta í fjölmiðla þannig að við enduðum á að þurfa að svara fyrir okkur.“
Sigríður fékk áfallastreitu eftir þetta en þrátt fyrir allt saman óskar hún Gunnari alls hins besta. „Mér þykir vænt um hann og hann hefur gert margt gott í mínu lífi.“
Hlustaðu þáttinn á vef RÚV eða í spilaranum hér að neðan.