Grínistinn Suzy Bennett ákvað að taka þátt í 42 km Full Moon MoonWalk eftir að móðir hennar greindist með brjóstakrabbamein. Bennett sem er búsett í Plymouth í Bretlandi gekk gönguna á Íslandi en ágóði göngunnar rennur til góðgerðarsamtaka fyrir brjóstakrabbamein.
Gangan hófst klukkan 23 að breskum tíma (klukkan 22 að okkar tíma) í kringum Mývatn og tók gangan Bennett níu klukkustundir að klára, en hún barðist við mikinn vind á leiðinni. Bennett sagðist vera „mjög stolt“ yfir því að hafa lokið sínu fyrsta maraþonmóti.
Bennett gekk þó sannarlega ekki ein því um 40 manna hópur kom hingað til lands af þessu tilefni og heldur heim á morgun.
„Sem betur fer er mamma laus við meinið, en ég hringdi í hana myndsímtal þegar ég kom yfir marklínuna, hún grét svolítið og ég grét líka. Ég var bara mjög stolt því ég hef aldrei gert neitt svona stórt áður og ég er bara mjög stolt af því að hafa klárað gönguna. Ég fór fram úr væntingum mínum um hversu miklu fé ég gæti safnað, fólk hefur verið mjög vingjarnlegt og gjafmilt.“
Bennett safnaði yfir 1.600 pundum (um 282 þúsund krónur) fyrir málefnið með því að klára gönguna um íslenskt landslag aðeins klædd brjóstahaldara að ofanverðu, sem er lykilatriði í góðgerðarviðburðinum.
„Þannig er reglan, að ganga í brjóstahaldara og því skrautlegri því betra,“ sagði hún. „Ég var að sjálfsögðu að fulltrúi Devon, svo ég var með glitrandi Devon-fána í hjartaformi sem var búinn til af heimakonu. Ég er líka fulltrúi Íslands með rauðu, hvítu og bláu röndunum og nokkrar pallíettur á bakinu.“
Bennett sagði að maraþongangan snerist „ekki bara um að safna peningum“ heldur einnig um að vekja athygli á einkennum brjóstakrabbameins.
„Brjóstakrabbamein mömmu greindist í brjóstamyndatöku, bara venjubundinni skimun. Hún var ekki með nein einkenni, þannig að hún bað mig að segja fólki að mæta í skimun. Brjóstakrabbamein er mjög algengt og það er auðvelt að meðhöndla það.“