Kántrýstjarnan Billy Ray Cyrus hefur sótt um skilnað frá eiginkonu sinni Firerose eftir aðeins sjö mánaða hjónaband.
Heimildir People herma að Cyrus sé dauðfeginn að vera að losna við eiginkonuna sem hafi reynst úlfur í sauðargæru.
„Hann hafði þetta á tilfinningunni allan tímann. Hann telur að hún hafi bara gifst honum út af peningum og álíka. Hann er sannfærður um að hún hafi ekki gifst honum út af ást“
Cyrus sótti um skilnaðinn með vísan til ósættanlegs ágreinings og óviðeigandi hegðunar í hjónabandi. Firerose hefur svarað skilnaðarkröfunni og segir skilnaðinn hafa komið henni að óvörum. Cyrus hafi sótt um skilnað upp úr þurru, degi áður en hún átti að gangast undir tvöfalt brjóstnám í forvarnarskyni. Hún sakar kántrýsöngvarann um andlegt og tilfinningalegt ofbeldi.
„Eiginkonan þurfti að umbera stöðuga neyslu eiginmanns síns samhliða neyslu hans á kannabis sem gerði eiginmanninn bæði ófyrirsjáanlegan og uppstökkan“
Cyrus sætti sig ekki við þessar ásakanir og krafðist um hæl ógildingarinnar á hjónabandinu með vísan til þess að Firerose hafi reynt að einangra hann frá fjölskyldu sinni. Hún hafi eins notað greiðslukort hans í heimildarleysi eftir að þau slitu samvistum og svo skrifað honum ástarbréf.
„Ég sakna þín meira en orð fá lýst elskan. Gerðu það, reynum að vinna okkur í gegnum þetta og verða frekar bara nánari eftir þessa hræðilegu reynslu. Ég þarfnast þín. Ég elska þig. Mér þykir þetta svo leitt,“ segir í meintu ástarbréfi.
Cyrus segist hafa fundið bréfið þegar hann sneri aftur á heimili sitt til 25 ára eftir að dómari gerði Firerose að yfirgefa húsnæðið. Lögmenn Cyrus benda á að ef hann væri sá ofbeldismaður sem Firerose lýsir þá væri hún væntanlega ekki að ganga áfram eftir honum með grasið í skónum.
Heimildir People herma að Cyrus sé á því að Firerose hafi nú sýnt sína réttu liti og Cyrus upplifi sig blekktan. Hann sé því tilbúinn að halda sínu striki án þess að líta til baka.