Brandari sem Hugrún Hannesdóttir birti á Tiktok á dögunum hefur slegið rækilega í gegn og fengið um fjórar milljónir áhorfa. Hugrún, sem er 27 ára gömul, er búsett í Bandaríkjunum ásamt kærasta sínum, Sindra Andrasyni.
Bandaríski miðillinn Newsweek fjallaði um um færsluna en í henni má sjá Hugrúnu vakna upp að værum blundi í Teslu-bifreið parsins og átta sig á því að Sindra er hvergi að sjá. Hann hafði þá brugðið sér inn í nærliggjandi verslun en passað upp á kærustuna. „Hann setti mig á hundastillinguna,“ segir Hugrún hálfhneyksluð í myndbandinu en vísar þá til eiginleika í Teslubifreiðum sem á að gera fólki kleift að skilja hunda sína eftir í bílnum í stutta stund. Stillingin sér til þess að loftkæling sé í bílnum og eigandinn þurfi ekki að hafa áhyggjur af því að gæludýrið stikni inni í bílnum en slík slys eru því miður alltof algeng vestra.
Hefur það vakið mikla lukku að stillingin henti ekki síður fyrir sofandi kærustur sem og ferfætlinga.
Í viðtali við Newsweek segir Hugrún að kærasti sinn sé almennt afar umhyggjusamur en tilgangur verslunarstoppsins var að kaupa batterí fyrir lyklakippu hennar. Hefur athugasemdum rignt inn þar notendur segja meðal annars að Sindri sé úrvals eiginmannsefni.
Parið flutti til Bandaríkjanna til að sækja þar nám í Carnegie Mellon-háskólanum. Útskrifuðust þau bæði árið 2022 en hafa ílengst ytra. Hugrún starfar í dag hjá stærsta tölvuleikjafyrirtæki heims, EA Games, sem einn af yfirmönnum gagnaöryggis.
@zacperian I am not a passenger princess, i am apparently a passenger b**ch✨#tesla #dog #fyp #pov #sleep #nap #passengerprincess ♬ Passenger Puppy – Hugrun
