Grallarinn og Íslandsvinurinn Bam Margera þurfti að skreppa úr brúðkaupinu sínu til þess að reyna að fá fyrra hjónaband sitt ógilt. Málaferli standa yfir gegn fyrrverandi meintri eiginkonu Margera, Nicole Boyd.
Margera, sem er 44 ára og þekktastur fyrir að tilheyra grallarahópnum Jackass, giftist unnustu sinni Dannii Marie á þriðjudaginn í Nýju Mexíkó. Brúðkaupsdagurinn var ákveðinn í október.
Í miðjum klíðum þurfti hann að skjótast til þess að bera vitni á Zoom fundi í réttarhöldum um ógildingu fyrra hjónabands.
Gifting Margera og Boyd fór fram í Hafnarhúsinu í Reykjavík í október mánuði árið 2013 við mikið húllumhæ. Steig hann á svið með hljómsveit sinni FuckFack Unstoppable og safnaði fé fyrir byggingu hjólabrettagarðs í Reykjavík. En á þessum árum kom Margera oft til Íslands og var titlaður Íslandsvinur.
Margera og Boyd bjuggu saman í nokkur ár og eignuðust einn son en síðan skildu leiðir. Í umgengnisdeildu þeirra kom á daginn að réttum pappírum hefði aldrei verið skilað úr giftingunni á Íslandi og hjónabandið því í raun ekki löglegt. Lögmenn Boyd halda því hins vegar fram að þau hefðu bæði verið í góðri trú um að þau væru gift og því ætti að beita lögjöfnun á samband þeirra.
Boyd hafði ekki frétt af brúðkaupi Margera og Marie fyrr en í réttarhöldunum á þriðjudag. Hún setti þó spurningarmerki við dagsetningu brúðkaupsins.
„Hvað sem gerir hann hamingjusaman. Ég samgleðst honum. En þetta var undarleg tímasetning, í ljósi þess að hann átti að mæta í réttarsal í dag,“ sagði Boyd við TMZ.
Það var þó vegna tafa á málinu sem vitnaleiðslan lenti á sama tíma og brúðkaupið. Upphaflega átti það að fara fram mun fyrr. Margera og Marie munu hins vegar ná að halda ótrufluð upp á brúðkaupið seinna, því að þetta var aðeins ein af tveimur athöfnum. Hin síðari fer fram í Pennsylvaníu í nóvember.
