Nú verða fjarfundir skuggalega raunverulegir og enn meira lifandi með þrívídd, gervigreind og annarri nýrri tækni. Google og HP ætla að leiða saman hesta sína og þróa byltingarkenndan veruleika fyrir fjarfundi og dreifða teymisvinnu.

Stór hluti af samskiptum fólks er í gegnum líkamstjáningu, til dæmis með svipbrigðum, líkamsstöðu eða hreyfingum. Erfitt getur reynst að miðla slíkum samskiptum í gegnum fjarfundi eða á vinnustöðum sem eru með dreifða starfsemi.

„Til þess að draga úr þeim hindrunum sem er á milli fólks á fjarfundum og skapa raunverulegri fundaupplifun hefur Google þróað verkefni sem nefnist Starline. Verkefnið gengur út á að nýta framfarir í gervigreind, þrívídd og annarri nýrri tækni til að skapa upplifun þeirra sem eru á fjarfundum eins og þeir séu staddir í sama rými. Þetta er í raun gríðarlega spennandi verkefni sem getur gjörbylt fundaupplifun fólks þegar fram í sækir,“ segir Gísli Þorsteinsson vörustjóri HP Poly fundalausna hjá OK.

„Nú hefur HP tölvuframleiðandinn gengið til liðs við Google Starline verkefnið með það að markmiði að skapa samvinnu- og fundaupplifun fyrir dreifð teymi á vinnustöðum. Samstarfið gengur út á að færa verkefnið af hugmynda- og þróunarstigi yfir í fullmótaða vöru.“

Stefnt er að því að slík lausn líti dagsins ljós á næsta ári. „HP mun leggja til vélbúnað og sérþekkingu, hljóð- og myndlausnir frá Poly fyrir þessa byltingarkenndu upplifun sem er ætlað að móta framtíð samvinnu og fjarfunda á vinnustöðum til framtíðar,“ segir Gísli.