Það dylst engum sem er og/eða hefur verið í sambandi að þau eru hellings vinna og snúast oft um málamiðlun milli tveggja ólíkra einstaklinga sem hafa tekið þá ákvörðun að ganga saman í gegnum súrt, en þó að mestu sætt.

Oft koma upp árekstrar sem hægt er að leysa úr, og þá jafnvel með aðstoð ráðgjafa. En hjónabandsráðgjafi einn segist aðspurður alveg klár á hvaða hegðun það er sem sýnir að sambandinu verði ekki bjargað.

„Ef annar aðilinn sýnir tilfinningum hins fyrirlitningu, þá er það búið!“

Kynlífs- og sambandsrannsakandinn Kristen Mark sagði í samtali við vefsíðuna The Knot: „Að hæðast að maka þínum, tala við hann með yfirlæti eða nota kaldhæðni með grimmdarlegum hætti er allt dæmi um fyrirlitningu.“

Annað dæmi sem nefnt hefur verið sem sérfræðingar segja benda til að erfiðleikar séu í sambandinu er þegar pör birta stöðugt myndir af sér saman.

„Þegar þau birta of mikið af myndum eða færslum af sér. Ég birti einstaka myndir af okkur saman en þegar þú skjalfestir og birtir allt sem þið gerið saman, þá lítur það út eins og þú viljir sanna samband ykkar út á við við annað fólk vegna þess að þú ert óörugg/ur.“