29. febrúar er hlaupársdagur og kemur aðeins einu sinni á fjögurra ára fresti. Í vestrænum ríkjum hefur hefðin verið sú, í gagnkynhneigðum samböndum, að karlmaðurinn biðji konunnar. En á hlaupársdag er blaðinu snúið við og er hefð fyrir því að það sé dagurinn þar sem konur fara á skeljarnar.

Stefnumótasérfræðingurinn Jana Hocking skrifar um þessa hefð og bendir á nokkrar frægar konur sem hafa „nýtt sér“ þennan dag, eins og söngkonan Pink, leikkonan Sarah Snook og leikkonan Kristen Bell.

„Þær eru ennþá giftar sínum mökum, þannig kannski er þetta góður fyrirboði,“ segir hún í pistli á News.com.au.

„En af hverju ættu bara pör að fá að njóta dagsins? Hvað ef við sækjum okkur innblástur í þessa hefð og eigum frumkvæðið þegar kemur að gaurnum (eða gellunni) sem við erum skotin í? Af hverju á þetta bara við bónorð?“

Hocking segir að í þau skipti þar sem hún hafi átt frumkvæði að samskiptum við karlmann hafi það gengið glimrandi vel.

„Ég hef aldrei heyrt karlmann kvarta yfir því að kona daðri við hann. Ég spurði Instagram fylgjendur mína og sögðu 98 prósent karlmanna að þeir myndu elska það ef kona myndi taka skarið,“ segir hún.

„Þannig í dag, prófum að stíga út úr þægindarammanum og tökum frumkvæði! Það þarf ekki að vera eitthvað klikkað, stutt skilaboð eða jafnvel nálgast einhvern á barnum?“