Fagfélag klassískra söngvara á Íslandi, Klassís, hefur sent frá sér tilkynningu þar sem fram komnu frumvarpi um stofnun Þjóðaróperu er fagnað.

Í tilkynningunni segir að um sé að ræða merkan áfanga í sögu sönglistar á Íslandi. Félagið lýsi eindregnum stuðningi við þau áform sem fram komi í frumvarpinu um stofnun Þjóðaróperu.

Klassís bindi miklar vonir við að frumvarp þetta verði að lögum sem fyrst. Enda hafi það lengi verið eitt helsta keppikefli innan óperugeirans á Íslandi að tryggja starfsgrundvöll söngvara eða allt frá því að Ragnhildur Helgadóttir lagði fram þingsályktunartillögu um fastráðningar söngvara við Þjóðleikhúsið fyrir tæpum 70 árum.

Í tilkynningunni segir enn fremur að með frumvarpinu verði óperulistin lögbundið sviðslistaform til jafns við leiklist og danslist. Með samlegð við Þjóðleikhúsið skapist grundvöllur til samfelldrar starfsemi, fastráðninga söngvara, fjölbreyttra atvinnutækifæra fyrir söngvara og ýmsa aðra hópa listamanna og spennandi möguleikar til nýsköpunar og framþróunar óperulistformsins, sem muni loks njóta jafnræðis á við leiklist og danslist.

Frumvarpið kveður á um að Þjóðaróperan verði undir hatti Þjóðleikhússins en ráðinn verði sérstakur stjórnandi óperunnar sem muni þó heyra undir þjóðleikhússtjóra. Gert er ráð fyrir að óperan geti ráðið í 12 stöðugildi fyrir einsöngvara og því ljóst að verði frumvarpið að lögum mun það veita klassískum söngvurum aukin atvinnutækifæri hér á landi.

Íslenska óperan sem haldið hefur úti óperflutningi í tæpa hálfa öld mun hætta starfsemi eftir niðurskurð á fjárframlögum ríkisins til hennar. Stjórn hennar lýsti yfir óánægju með að Þjóðaróperan yrði ekki reist á grunni Íslensku óperunnar eins og rætt hefði verið. Það stefnir því allt í að á meðan Þjóðaróperan hefur ekki verið stofnuð verði lítilli sem engri starfsemi sem tengist flutningi á óperum haldið úti á Íslandi.