Í hverju samfélagi er lítill hópur svokallaðra preppara. Dregið af enska orðinu prepare (undirbúa sig). Þetta er fólk sem gerir ráðstafanir til þess að geta sem best lifað af einhverjar meiriháttar hamfarir, svo sem kjarnorkuheimstyrjöld, uppvakningafaraldur eða árekstur loftsteins við jörðu.
Prepparar eru einnig til á Íslandi eins og sést á samfélagsmiðlum. En þar lýsir einn ónafngreindur preppari hvað hann gerir til að undirbúa sig undir það versta.
„Ég er ekki að preppa fyrir heimsenda né styrjaldir, en náttúran getur verið ógnvekjandi hér á Íslandi,“ segir hann. Aðalástæðan fyrir þessu sé hins vegar sú að þetta sé skemmtilegt áhugamál.
„Ég og bróðir minn byrjuðum á þessu fyrir tíu árum síðan eftir að við horfðum á þætti sem hétu „Doomsday Preppers“,“ segir hann. „Í fyrstu var þetta bara bakpokar með allt nauðsynlegt, föt, gönguskór, vegabréf, peningar, vasaljós, útvarp, svo eitthvað sé nefnt. En svo stækkaði fjölskyldan og safnið, og bakpokinn varð allt í einu nokkrir duffle bags [e. dufflar], og núna er þetta orðið meira útilegubúnaður og matarpakkar.“
Systkinin, einkum hann og bróðir hans, hafa komið fyrir neyðarbirgðum í sumarbústað foreldra þeirra. Þar geta fjölskyldurnar komist fyrir en þurfa þykir.
„Prepp þarf ekki alltaf að flýja heiman, og ég hef líka heimili sem griðastað, þar sem ég hef allt til þess að lifa nánast óbreyttum lífsstíl í þrjá mánuði, í það minnsta,“ segir prepparinn. Hann eigi rafal, ferðagashellu og fleira þar.
Við kaup á bíl sínum hafði hann preppið einnig í huga. Keypti hann Toyota Hilux, breyttan með alls kyns aukahlutum. „Ef til þess kæmi að ég verð að flýja með fjölskylduna þá get ég fyllt bílinn á um 15-20 mínútum af öllu preppaða búnaðinum.“
Þá listar hann ýmsa muni sem eru ómissandi fyrir prepp. Eitt af því mikilvægasta er öflug lofttæmingarvél. Ekki aðeins til þess að geyma máltíðir í heldur einnig fötum og öðru dóti. Með lofttæmingu sé betra að raða pökkunum.
Kerti eru mjög mikilvæg, glósubók og blýantur (ekki penni), veiðarfæri eins og veiðistangir, net og skotfæri. Einnig er mikilvægt að æfa sig að nota þessa hluti. Einnig er mikilvægt að eiga mikið af hreinlætisvörum eins og sápu, spritti, blautklúta, tannkrem, tannbursta og fleira.
„Ég passa alltaf upp á að eiga lágmark þriggja mánaða birgðir af þurrmat sem er hefur langan endingartíma, 2 ár og alveg upp í 7 ár einnig hef ég slatta af hrávöru eins og hveiti, geri, sykri og svoleiðis,“ segir prepparinn. „Ekki er gott að vera með mikið frosnu fæði. Ef þú missir rafmagnið í lengri tíma, er hætta á að þú tapir öllum matnum mjög fljótt. Þegar keyptur er matur sem endist lengi, er nauðsynlegt að kunna aðeins á næringartöfluna og panta litlar einingar af matnum og smakka hann áður en þú kaupir hann í magni, til þess að þú sitjir ekki uppi með vondan mat ef þú þarft á honum að halda.“
