Xenia prinsessa af Saxlandi í Þýskalandi varð á dögunum fyrsta aðalsmanneskjan til að sitja fyrir nakin í tímaritinu Playboy. Xenia prýðir forsíðu mars-heftis þýska Playboy.

Xenia er 37 ára en hún er afkomandi Friðriks Ágústs III sem var síðasti konungur Saxlands.  Hann sagði af sér eftir ósigur Þjóðverja í fyrri heimsstyrjöldinni og var konungsríkið leyst upp í kjölfarið.

Um er að ræða sjötta fjölmennasta sambandsland Þýskalands en höfuðborgin þar er Dresden og eru íbúar um fjórar milljónir talsins.

Nokkrar myndir af Xeniu eru í blaðinu og á einni situr hún berbrjósta við sundlaugarbakka.

Viðtal við Xeniu er svo inni í blaðinu og segist hún þar vilja sýna með myndunum að „allar konur eru fallegar eins og þær eru“.

„Þú þarft ekki að fylgja einhverjum trendum eða gangast undir aðgerð á líkama þínum bara til að þóknast einhverjum öðrum. Ég er með slitför og er stolt af þeim.“

Xenia hefur meðal annars komið fram í raunveruleikaþáttum í Þýskalandi og tekur núna þátt í þáttum sem heita B:Real – Real Celebrities, Real Life.