Mirror greindi frá því fyrr í dag að breska konungsfjölskyldan hefði enn ekki óskað Meghan Markle opinberlega til hamingju með afmælið en hún á 42 ára afmæli í dag.

Þótt að Meghan og eiginmaður hennar Harry prins hafi sagt sig frá skyldustörfum sem hluti af konungsfjölskyldunni árið 2020 og flutt í kjölfarið til Bandaríkjanna hefur fjölskyldan þó haldið áfram að óska henni til hamingju með afmælið, á samfélagsmiðlum sínum, eins og venjan hefur verið síðan hún varð hluti af fjölskyldunni.

Fyrsta afmælisdag Meghan eftir að hjónin sögðu sig frá skyldustörfum og fluttu til Bandaríkjanna var það drottningin sáluga sem hafði forystu um að óska Meghan til hamingju með afmælið og var það gert á Instagram-reikningi konungsfjölskyldunnar.

Bróðir Harry Vilhjálmur prins og eiginkona hans Katrín fylgdu í kjölfarið og sama gerðu Karl, faðir Harry og núverandi konungur Bretlands, og eiginkona hans Kamilla.

Á næsta afmælisdegi Meghan, árið 2021, óskaði konungsfjölskyldan henni til hamingju á Twitter.

Þegar kom að afmælisdegi Meghan á síðasta ári lét fjölskyldan nægja að óska henni til hamingju með færslum í svokallaðri „story“ á Instagram en slíkar færslur renna út eftir 24 klukkustundir.

Á fyrri árum hafa hamingjuóskir konungsfjölskyldunnar til Meghan, á afmælisdaginn hennar, verið birtar á samfélagsmiðlum klukkan 9 að morgni að breskum tíma en klukkan 15 síðdegis í dag höfðu engar slíkar færslur enn verið birtar.

Mirror taldi þó mögulegt að konungsfjölskyldan ætlaði sér að bíða þar til klukkan yrði 9 að morgni í Kaliforníu í Bandaríkjunum þar sem Meghan og Harry eiga heima.