Leikarinn Dominic Purcell, sem gerði garðinn frægan í sjónvarpsþáttunum Prison Break, og Tish Cyrus, móðir tónlistarkonunnar Miley Cyrus, gengu í það heilaga um helgina í fallegri athöfn í Los Angeles. Dóttirin heimsfræga brá sér í hlutverk brúðarmeyjar við athöfnina ásamt systur sinni Brandi og virtist alsæl með ráðahaginn.

Hlutirnir gerðust hratt hjá parinu en Trish, sem er 56 ára og þremur árum eldri en Purcell, greindi frá sambandi þeirra í nóvember á síðasta ári, aðeins nokkrum mánuðum eftir að hafa skilið endanlega við föður Miley og eiginmann sinn til 28 ára, Billy Ray Cyrus.

Rómantíkin ágerðist hratt og í apríl var síðan greint frá því að turtildúfurnar hefðu trúlofað sig og að brúðkaup, sem nú hefur farið fram, væri í vændum.