Heimili hjónanna, Chrissy Teigen, fyrirsætu, matarbloggara og bókaútgefanda, og tónlistarmannsins John Legend, og þriggja barna þeirra í Beverly Hills í Kaliforníu er bæði bjart, rúmgott og opið með náttúruna fyrir utan. Nóg pláss til að leika, njóta og skapa fyrir stóra fjölskyldu. Hjónin eiga dótturina Lunu sjö ára, soninn Miles fimm ára og soninn Esti sem fæddist nú í júní með staðgöngumæðrun.

Í nýjasta tölublaði Architectural Digest og á vef blaðsins er innlit á heimili fjölskyldunnar, en hjónin eru dugleg að flytja og gera hvert heimili að sínu í takt við lífsmáta þeirra hverju sinni.

„Við erum alltaf opin fyrir nýju heimili eða að breyta heimilinu sem við búum í,“ segir Teigen. „Þegar hún segir við, þá meinar hún ég,“ skýtur Legend að. „En þetta er rétt, við erum ekki hrædd við að breyta til.“

„Hvert hús sem við höfum átt hefur endurspeglað viðkomandi kafla í lífi okkar. Síðasta húsið okkar var myrkara og meira lokað. Við heilluðumst af þessu húsi vegna þess hversu bjart og opið það er, og hvernig það tengist náttúrunni,“ segir Legend. 

Hjónin fengu hönnuðinn Jake Arnold til að aðstoða sig við breytingar á heimilinu og útkoman er glæsileg. Sá hann einnig um hönnun á upptökustúdíói Legend og skrifstofuhúsnæði fyrir Craving, fyrirtæki Teigen.