Leikarahjónin heimsfrægu Ashton Kutcher og Mila Kunis hafa ákveðið að bjóða upp á ókeypis gistingu, í eina nótt, í húsi sem þau eiga við ströndina í Santa-Barbara í Kaliforníu. Útsýnið frá húsinu er sagt einkar glæsilegt en gistinguna bjóða hjónin í gegnum Airbnb. Allt að fjórum gestum verður boðið að eiga það sem hjónin kalla ógleymanlega sumardvöl.

Í myndbandi sem hjónin birtu á Instagram og tekið var fyrir utan umrætt hús sagði Kutcher við konu sína að hann hefði fengið þá „heimskulegu hugmynd“ að bjóða ókunnugu fólki að koma og gista hjá þeim í húsinu. Hann náði hins vegar að sannfæra Kunis um að þau skyldu demba sér í þetta og hún var sammála honum um að fólk myndi án efa njóta þessarar reynslu.

Opnað var fyrir bókanir í gær en fyrirvarinn er stuttur þar sem gistingin verður í boði næstkomandi laugardag. Kutcher sagði í færslu á Instagram að vel yrði tekið á móti gestunum og þegar þeir yfirgefi húsið á sunnudag verði það án efa eins og kveðja gamla vini.

Í auglýsingu hjónanna á Airbnb kemur meðal annars fram að heitur pottur sé við húsið og það sé umkringt trjám. Einnig er tekið fram að gestir geti farið í gönguferðir um nágrennið og fengið sér kaffibolla á ströndinni. Allar máltíðir verða innifaldar í gistingunni.

Til að fá tækifæri til að vera gestur stjörnuhjónanna þarf að hafa virkan prófíl á á Airbnb og hafa góðan feril að baki í fyrri viðskiptum þar. Einnig þurfa gestir að geta framvísað skilríkjum sem gefin eru út af hinu opinbera í Bandaríkjunum.

Kutcher og Kunis fylgja með þessu í fótspor annarar kvikmyndastjörnu, Gwyneth Paltrow, sem tilkynnti fyrr í þessum mánuði að hún myndi bjóða fría gistingu í eina nótt í gestahúsi sínu í Montecito í Kaliforníu, í gegnum Airbnb.

Gestahúsið er með einu svefnherbergi og með einu baðherbergi og stendur við heimili Paltrow. Opnað var fyrir bókanir fyrr í þessari viku en í boði er gisting fyrir tvo gesti þann 9. september næstkomandi.

Það var CNN sem greindi frá.