Kanadíska athafnakonan og áhrifavaldurinn Sarah Nicole Landry er stödd á Íslandi og er dolfallin af landinu (eins og flestir sem hingað ferðast). Landry hefur verið dugleg að deila myndum frá ferðinni á Instagram þar sem hún er með rúmlega 2,3 milljónir fylgjenda.
Landry er þekktust sem talskona jákvæðrar líkamsímyndar undir nafninu The Birds Papaya og er hún þekkt undir því nafni á samfélagsmiðlum, hún er jafnframt með heimasíðu og hlaðvarp með sama nafni.
Á Instagram má sjá að hún er búin að fara í Bláa lónið og ganga að eldgosinu við Litla-Hrút sem hún segir hafa verið einstaklega krefjandi en um leið magnaða upplifun, núna sé engin áskorun henni ofviða. Á leið tilbaka frá gosinu birti Landry mynd þar sem hún skrifar „Iceland ILYSM“ eða Ísland ég elska þig svo mikið.
Landry er gift og á einn son með eiginmanni sínum, auk þriggja barna frá fyrra hjónabandi og eru börnin fjögur á aldrinum 1-16 ára.
