Eins og alþjóð veit þá er stjörnukokkurinn og Íslandsvinurinn Gordon Ramsay enn á ný staddur á landinu. Svo virðist sem Ramsay hafi ákveðið að taka sér alfarið frí frá eldamennskunni og kanna veitingastaði miðborgarinnar.
Í gærkvöldi sást til hans og fylgdarliðs á veitingastaðnum OTO sem er einn sá nýjasti í veitingastaðaflórunni. Lét Ramsay einstaklega vel af matnum og þjónustunni og sagði matinn þetta kvöld einfaldlega besta mat sem hann hefur borðið hérlendis.
„Hann fékk sér nauta flanksteik, bikini réttinn okkar vinsæla, lamb, tagliatelle, hörpuskel og svo sítrónu í eftirrétt,“ segir Sigurður Laufdal eigandi OTO og yfirkokkur í samtali við DV.
Gordon Ramsay pantaði átta manna borð og mætti á staðinn ásamt félögum sínum til lengri tíma að hans sögn. Eftir matinn vippaði Ramsay sér inn í eldhús, hrósaði og sat fyrir á myndum með starfsfólkinu.
„Hann kom inn í eldhús óumbeðinn og þakkaði fyrir sig og hrósaði bæði mat og þjónustu í hástert,“ segir Sigurður sem segist mikill aðdáandi Ramsay og hafa verið lengi.
„Gordon er þekktasti matreiðslumaður heims þannig það er smá súrrealískt að fá svona hrós frá honum.“
Veitingastaðurinn OTO er splunkunýr, en hann opnaði í lok apríl á Hverfisgötu 44. Aðspurður um hvernig viðtökurnar hafa verið segir Sigurður: „Viðtökur hingað til hafa verið mjög góðar og erum við nú þegar komnir með okkar fastagesti. Hingað til hafa gestir verið heimamenn, fyrir utan Ramsey og hans fylgdarlið. Við erum það nýr staður að ég held að ferðamenn hreinlega viti ekki af okkur enn sem komið er, á meðan íslendingar eru aðeins búnir að heyra af okkur.“
Þrátt fyrir að OTO sé nýr staður þá er eigandinn enginn nýgræðingur í bransanum. Sigurður hefur komið víða við, verið kosinn matreiðslumaður ársins, keppt í Bocuse D’Or tvisvar og unnið sem sous chef á einum þekktasta veitingastað heims, Geranium í Kaupmannahöfn. Hann átti alltaf draum um að opna eigin veitingastað og nú hefur sá draumur orðinn að veruleika.
„Ég man þegar ég var að byrja í veitingabransanum, þá dreymdi mig um að verða matreiðslumaður ársins, vinna á flottum Michelin-stað og opna minn eigin veitingastað,“ segir Sigurður og nú hafa allir þeir draumar ræst en Geranium er með þrjár Michelin-stjörnur.
Á OTO mætast áhrif Ítalíu og Japans í matargerð í fjölbreyttum matseðli sem samanstendur af mörgum réttum, stórum og smáum. „Nafnið er smá orðaleikur með Kyoto og Tokyoto, við tókum sem sagt hluta úr þeim orðum fannst það hljóma vel, stutt og laggott,“ sagði Sigurður í viðtali við Veitingageirann þegar staðurinn opnaði. „Annars er þetta búið að vera ótrúlega skemmtilegt ferli, að opna sinn eigin veitingastað, þetta er ólíkt því sem ég þekki og hef verið í áður og það er búið að vera bæði krefjandi en jafnframt skemmtilegt, lærdómsríkt ferli.“
