Fylgjendur bikínifyrirsætunnar Millu Sofia heillast af henni og myndunum sem hún póstar á samfélagsmiðla og segja hana „náttúrulega fagra.“ Sofia er með vefsíðu og er á öllum samfélagsmiðlum, á TikTok er hún með tæplega 93 þúsund fylgjendur, á Instagram 34 þúsund fylgjendur og Sofia er einnig á Twitter, Pinterest og YouTube. 

Sofia sem sögð er 19 ára og búsett í Helsinki í Finnlandi póstar nær eingöngu bikínimyndum af sér víðs vegar um heiminn. Og fylgjendur eru hrifnir:

„Náttúruleg fegurð sem hefur allt.

„Þú lítur dásamlega út, ótrúleg, falleg, glæsileg, töfrandi og hrífandi.“

 „Þú ert eins og sólin, þú færð mig til að brosa og gleður mig.“

Ofangreind ummæli eru á meðal hundrað ef ekki þúsunda sem skrifuð eru við hverja mynd Sofiu. Sem dæmi þá er sú nýjasta á Instagram sem birt var fyrir sólarhring með 1615 læk og 108 athugasemdir þegar þetta er skrifað.

Vissulega er Sofia mjög falleg, en þegar rýnt er betur í myndirnar má sjá að þær eru eiginlega of fullkomnar, en Sofia hefur þó ekki breytt myndunum með hinum ýmsu forritum eins og margar samfélagsmiðlastjörnur eiga til að gera. Hafi fylgjendur fyrir því að lesa lýsingu hennar á samfélagsmiðlum, svokallað Bio, kemur nefnilega sannleikurinn í ljós. Sofia og allar myndir hennar eru búnar til með gervigreind (AI).

Margir fylgjenda Sofiu á samfélagsmiðlum virðast ekkert taka eftir þessu, eða er kannski bara alveg sama. Margir reyna þó að benda á staðreyndina um Sofiu í athugasemdum.

„Öll ummælin sem hrósa henni… verst fyrir ykkur.“

„Millie er persóna búin til af gervigreind svo það er forritið sem þú ert að hrósa.“

„Elska þetta listaverk, þetta er flott, en um leið svo raunverulegt að það skelfir mig.“

„Hahahaha athugasemdirnar frá þessum aumingjum sem halda að þessi skvísa sem alvöru, í alvöru strákar!“