Egill Helgason, ein helsti málsvari íslensku menningarelítunnar, er búinn að fá sig fullsaddan á þeirri efnishyggju sem ríkir meðal áhrifavalda og tónlistarmanna hérlendis.
„Gústi B kaupir sér Rolex, Prettyboitjokko kaupir dýra sundbrók og sportbíl, Gummi kíró gengur í Gucci. Um svonalagað les maður daglega í fjölmiðlum. Hvaðan kemur þessi asnalega efnishyggja?“ spyr Egill í stuttri hugleiðingu á Facebook-síðu sinni sem vakið hefur sterk viðbrögð.
Egill segist muna þá tíð að flagga slíku hafi þótt alveg innilega ófínt. „En nú er því stillt upp eins og þarna sé gríðarlega eftirsóknarverður veruleiki,“ skrifar Egill.
Ljóst er að sjónvarpsmaðurinn góðkunni hitti þarna á taug því athugasemdirnar við færsluna hrúgast inn og eru allar á einn veg. Leikarinn Pálmi Gestsson segir að um „úrkynjun“ sé að ræða og Bubbi Morthens er á svipaðri línu. „Umbúðir ekkert innhald,“ segir tónlistarmaðurinn og annar risi, Björgvin Halldórsson bætir við: „Endalaus sjálfshátíð“.
Tónlistarmaðurinn og fyrrum ráðherrann Óttar Proppé vill hins vegar snúa vörn í sókn.
„Ég gef mér að þetta sé sá hluti fjölmiðlaafurða sem byggir á aðsendu efni utan úr bæ lítt ritskoðuðu. Mögulega er hér komið merki um að vér menningarmafían þurfum að herða oss og vera duglegri við að framleiða hágæða’kontent’ handa miðlunum til að lyfta gæðum umræðunar. Allir í bátana!“
Og svo er það tónlistarmaðurinn Villi Goði sem horfir dreyminn til liðinna tíma.
„Já betri var tíðin þegar menn fóru í ljós þrisvar í viku. Mættu reglulega í líkamsrækt, fóru í Hollywood um helgar með mynd af bílnum í vasanum.“
