Ásdís Rán hefur gegnt mörgum hlutverkum í gegnum tíðina; glamúrfyrirsæta, einkaþjálfari, þyrluflugmaður, umboðsmaður, rithöfundur og fatahönnuður svo fátt sé nefnt.
Hún hefur prýtt forsíðu Playboy og Maxim, sem eru tvö vinsælustu tímarit heims. En nú hafa tímarnir breyst, útgáfa prentmiðla hefur dregist saman og leita stjörnur á önnur mið til að afla sér tekna og sinna ástríðunni.
Ásdís Rán fetar í fótspor frægra vinkvenna sinna – fyrirsætanna Carmen Electra, Katie Price og Coco og leikkonunnar Bellu Thorne – og kemur með glamúrinn á OnlyFans.
Hún opinberar þetta í Fókus og segir að um sé að ræða glamúrmyndir og myndir úr myndatökum sem hefðu áður ratað í tímarit.
„[Þetta er] sama og ég hef alltaf gert. Ég er svolítið að færa mig frá því að pósa í tímaritum, því nú eru bara eitt, tvö tímarit eftir. Þá er þetta bara allt að færast svolítið yfir á samfélagsmiðla. Standardinn minn er aðeins stærri en Instagram, ég nenni ekki að vera að keppast við að pósta einhverjum myndum þar. Frekar vil ég geta haldið áfram að taka mínar myndir, sem eru yfirleitt glamúrmyndir, og þarna hef ég tækifæri að deila þeim,“ segir Ásdís Rán.
Hún hefur reynt að deila myndunum á Facebook en það eru fáir miðlar með jafn strangar reglur og sá miðill þegar kemur að myndbirtingum.
„Ef ég deili einhverju á Facebook þá er prófílnum mínum lokað í mánuð, fæ 500 tilkynningar ef myndin er of kynþokkafull. Maður er löngu búinn að gefast upp á því að deila einhverju þar,“ segir hún.
Síðan er vettvangur fyrir aðdáendur hennar að fylgjast með Ísdrottningunni og skýrt skal tekið fram að hún er ekki að framleiða klám.
„Þetta er klárlega framtíðin. Það er mikill misskilningur hérna, sérstaklega því landið er svo lítið, að OnlyFans sé einhver klámsíða. Það er bara bull. Það eru kokkar þarna, líkamsræktarþjálfarar, það eru mömmur, einhverjir bílakallar og alls konar fólk sem er þarna með vettvang til að ná sér í tekjur frá sínum aðdáendahóp,“ segir hún.
Ásdís Rán segist kannski ekki mæla með þessu fyrir venjulegt fólk.
„Það er örugglega ekki mjög auðvelt að vera venjuleg manneskja og byrja með OnlyFans, þá væntanlega þarftu að framleiða klám eða eitthvað til að byggja upp [aðdáendahóp]. En fyrir mig, sem er með tugi eða hundruði þúsunda aðdáenda, þá bara færi ég mig bara þarna yfir og get séð um mína aðdáendur þar,“ segir hún.
Fylgstu með Ásdísi Rán á Instagram, Facebook og hlaðvarpsþætti hennar, Krassandi konur, á YouTube.
