Nýsjálenska leikkonan Melanie Lynskey hefur skotist upp á stjörnuhiminn að nýju eftir velheppnað innkomu í sjónvarpsþáttaröðinni The Last of Us og ekki síður vegna hlutverks hennar í þáttunum Yellowjackets sem hlotið hafa talsvert lof.
Á dögunum vakti viðtal við hana í hlaðvarpinu Happy Sad Confused talsverða athygli en þar opnaði hún sig um vináttu sína við stórleikkonuna Kate Winslet á árum áður og hversu sárt það hafi verið að samband þeirra hafi fjarað út.
Melanie og Kate fóru með aðalhlutverkin í kvikmyndinni Heavenly Creatures í leikstjórn Peter Jackson árið 1994 en þá voru þær báðar svo til óþekktar leikkonur.
Mikil og góð vinátta myndaðist milli leikkvennanna á meðan tökum stóð en þremur árum síðar hlaut Kate alheimsfrægð fyrir hlutverk sitt í stórmyndinni Titanic og hefur ekki litið tilbaka síðan. Verkefnin hrúguðust inn og tíminn varð af skornum skammti.
„Þegar ég missti sambandið við Kate þá fylgdi því meiri sársauki en við sum sambandsslit sem ég hef upplifað. Það var svo sárt. En það gerðist ekkert milli okkar. Hún var bara ein stærsta kvikmyndastjarna heims og hafði engan tíma aflögu. Og sambandið fjaraði bara út, eins og í öðrum sambandböndum þegar fólk vex í sundur,“ segir Melanie í viðtalinu.
Hún segir að það hafi spilað inn í að þetta var eitt af hennar fyrstu verkefnum og hún var ekki orðin sjóuð í því hvernig kvikmyndabransinn virkar. Fólk vinnur náið saman í einhverjar vikur eða mánuði að einhverjum verkefnum en svo þegar því er lokið þá tvístrast hópurinn og fólk hverfur til annarra starfa. Það hafi reynst eftir.
„Ég var alltaf svo sár að tapa þessum nánu samböndum sem ég hafði myndað en það er orðið auðveldara í dag,“ segir Melanie.
Leiðir hennar og Kate hafi nánast ekkert legið saman síðan en það gæti breyst í ljósi þess að frægðarsól Melanie fer ört vaxandi.
