Steikhúsið er veitingastaður mars mánaðar í þættinum Matur og heimili og fagnaði 10 ára afmæli á síðasta ári. Steikhúsið er annálað fyrir ómótsæðilega ljúffengar steikur og framúrskarandi þjónustu. Í þætti kvöldsins hittir Sjöfn Þórðar þáttastjórnandi þá félaga Eyjólf Gest Ingólfsson matreiðslumeistara og Hilmar Hafsteinsson framreiðslumeistara en þeir eiga og reka Steikhúsið ásamt Níels bróður Hilmars og Hafsteini föður Hilmars.

Steikhúsið er í hjarta miðborgarinnar stendur við Tryggvagötu 4-6 í húsi sem á sér sögu og gaman er að geta þess að lógó Steikhússins vísar í söguna. Hilmar og Eyjólfur segja aðeins frá tilurð þess að tannhjólið og hamarinn prýði lógó staðarins.

Mikill metnaður er lagður í val á steikum sem boðið er upp á og allt meðlæti gert frá grunni. „Frá opnun staðarins árið 2012 höfum við lagt ríka áherslu á að framreiða gæða steikur við allra hæfi og bjóða upp á framúrskarandi þjónustu,“ segir Hilmar og bætir við að það skipti sköpun að starfsteymið vinni sem ein heild.

Þegar Sjöfn spyr hver sé galdurinn bak við að staðurinn eldist jafnvel og raun ber vitni segja þeir að starfsfólkið skipti sköpun, að vera með gott starfsfólk og öflugt samstarf sé lykillinn að velgengni.

Að bjóða upp á hina fullkomna steik liggur mikil fræði og rétt eldun skiptir sköpun, það vita þeir sem þekkja vel til. Í eldhúsinu á Steikhúsinu er falið leyndarmál sem tryggir þetta bragð, áferð og stöðugu eldun sem steikurnar þeirra eru þekktar fyrir. Sjöfn fær þá Eyjólf og Hilmar til að afhjúpa leyndardóm Steikhússins í þætti kvöldsins.

Eyjólfur bregður sér í eldhúsið og býður Sjöfn í smakk á tveimur vinsælustu steikum staðarins. „Þetta er fullkomin eldun á steikinni og hún bráðnar í munni,“ segir Sjöfn eftir fyrsta bitann.

Meira í þætti kvöldsins um heimsókn Sjafnar á veitingastað mars mánaðar, Steikhúsið á Hringbraut í kvöld, fyrst klukkan 19.00 og aftur klukkan 21.00.

Hér má sjá brot úr þætti kvöldsins:

Matur & Heimili - Stikla 28. febrúar 2023