Einn ástsælasti matreiðslumaður landsins Gísli Matthías Auðunsson, sem alla jafnan er kallaður Gísli Matt og landsliðskokkar Héðins taka höndum saman um helgina á Héðinn Kitchen & Bar og afhjúpa leyndardóma Slippsins. Í gærkvöldi var frumsýning á matseðlinum sem sló í gegn og matargestir höfðu orð á því að þeir hefðu aldrei upplifað aðra eins matarupplifun sem snertu hvern streng matarsálarinnar, matargerðin hafi verið framúrskarandi og nýstárlegir réttir hefðu verið bornir fram sem aldrei hafi sést áður.
Frumlegur og fágaður 7 rétta matseðill úr því besta sem hafið og náttúran gefur
Boðið er upp á sjö rétta frumlegan og fágaðan matseðil sem endurspeglar allt það besta hráefni sem hafið og náttúran gefa eða ávextir hafsins sem útleggst (fruit de mer á franskri tungu). Frumleikinn í framsetningu réttana fanga augun og útfærslan á réttunum er einstök, hreinlega lostafull fyrir bragðlaukana. Hugmyndaauðgi með brögð og framsetningu heilluðu matargesti upp úr skónum enda matarupplifun í boði sem á sér fáa líka hérlendis.
Gísli Matt og kokkar Héðins Kitchen & Bar fóru á kostum í gærkvöldi og buðu veitingagestum upp á háklassa rétti sem kveiktu á öllum skilningarvitum matargesta. Stemningin á staðnum var ólýsanleg og Gísli Matt bar fram matinn með þjónunum að sinni alkunnu snilld og kynnti réttina til leiks sem gerði upplifunina enn skemmtilegri.
Leyndardómar Gísla Matt afhjúpaðir
Matseðillinn er í anda Slippsins í Eyjum, þar sem innblástur er sóttur til íslenskrar náttúru og hafsins. Gísli er einn af eigendum veitingastaðarins Slippsins í Vestmannaeyjum og hafa bæði Gísli og staðurinn notið mikilla vinsælda og vakið mikla athygli hérlendis sem og erlendis. Það sjávarfang sem meðal annars var borið fram, var hörpuskel, þorskvængir, ígulker, þari og sólkoli.
„Fyrsta kvöldið fór fram úr væntingum og hér iðað allt af lífi og matarástin blómstarði samkvæmt Gísla Matt. Matreiðsla er mín ástríða og matseðillinn endurspeglar allt það besta sem hafið og náttúran gefur okkur og hversu gott hráefni við höfum í höndunum til að skapa einfalda en fágaða rétti. Réttirnir lýsa vel minni sýn og nálgun á matargerð,“ segir Gísli og er farinn að hlakka mikið til kvöldsins með teyminu á Héðinn Kitchen & Bar.
Matseðillinn er samsettur af sjö frumlegum og fáguðum réttum og vínpörun verður í boði fyrir þau sem vilja taka þetta alla leið. Einstök matarupplifun sem enginn sælkeri vill missa af. Hér má sjá brot af því sem boðið var upp á:
Boðið var upp á beltisþarasoð & stökkt þorskroð , með jurtakremi og brenndu smjör. Nýstárlegt og góð byrjun fyrir það sem koma skal.
Ótrúlega fallegur og frumlegur réttur, ígulker, piparrótarrjómi & söltuð rifsber.
Grilluð hörpuskel var borin fram á greni með hvítlauk & söl. Fullkomin samsetning.
Með hörpuskelin var borinn fram þessi fallegi réttur. Blóðbergsgrafin lúða, laukar, brennt smjör og vatnakarsi.
Sá allra frumlegasti og sterkasti rétturinn sem skemmtilega óvart hjá matargestum. Þorskvængir, grillaður eldpipar, reykt súrmjólk og sítrónutimían.
Þjóðlegasti rétturinn kominn í sparibúninginn og brögðin heilluðu. Blóðmör, borin fram með sherry, rúsínum og blóðmarengs.
Heileldaður sólkoli með smjörsósu, radísum, eplum og hrognum sló í gegn og framsetning einstaklega skemmtileg. Með sólkolanum voru bornar fram grillaðar rauðar kartöflur með svartkáli, sýrðum þara og reyktu eggjakremi.
Lostafullur eftirréttur sem kveikti í bragðlaukunum innihélt skyr og hvítsúkkulaðimús, bláberja- og blóðbergskrap með mysufroðu og lakkríssaltmarengs. Þvílíkir töfrar í matargerðinni.
