Pétur Einarsson hagfræðingur, kvikmyndaframleiðandi og fyrrverandi forstjóri Straums fjárfestingarbanka, er nýjasti gestur Frosta Logasonar í þættinum Spjallið. Pétur hefur síðustu ár helgað sig því að annast meðferðir fólks í vímuefnavanda og hefur verið undanfarin misseri í tilheyrandi námi í Bandaríkjunum. Í þættinum segir Pétur meðal annars frá því að hann telji að boð og bönn leysi ekki vanda þess hóps sem glímir við vímuefnavanda.

Kynningarstikla fyrir þáttinn er aðgengileg á Youtube.

Í upphafi hennar segir Pétur:

„Þú getur bannað allt áfengi og dóp í heiminum eða sent alla sem eru með þennan fíknivanda til tunglsins. Þú ert ekki búinn að leysa vandann. Þau eru ennþá andlega veik. Þannig að lausnin er í því og það er þessi uppgjöf … Það er það að viðurkenna þetta. Það er svo erfitt. Það er svo mikil skömm eða afneitun en þegar ég get viðurkennt það og sætt mig við það þá byrjar hugurinn að opnast. Opnast fyrir einhverju góðu, fyrir einhverju andlegu, fyrir að vera ekki að sjá vandamál í öllum öðrum.“

Frosti glímdi sjálfur við vímuefnavanda og tekur undir með Pétri að fólk í slíkri stöðu þurfi að sjá að það sjálft geti breyst í stað þess að kenna öllum öðrum um vanda sinn.

Pétur segir að það sé auðvelt að benda á aðra en þegar slíkri hugarfarsbreytingu sé náð gerbreytist viðkomandi í raun en þó kannski ekki alveg:

„Þetta er bara ekki sama manneskjan eða þetta er raunverulega manneskjan. Hún er að endurheimta … Ég er að endurheimta sjálfan mig. Ég er að finna aftur sjálfan mig.“

Pétur leggur einnig áherslu á að fólk í vímuefnaenda skilgreini sig ekki sem fíkla eða alkóhólista heldur sem manneskjur með þessa sjúkdóma.