Pólskur maður að nafni Ireneusz, sem er búsettur á Reyðarfirði, tók þátt í stefnumótaþætti í pólsku sjónvarpi fyrir skemmstu. Hann hlaut hins vegar ekki náð fyrir augum Agnieszku, sem gat valið úr sex vonbiðlum.
Það var Austurfrétt sem greindi fyrst frá þátttöku Ireneusz í þættinum, sem kallast „Bóndi vill kvongast“.
Ireneusz hefur verið búsettur á Íslandi í fjögur ár. Í þættinum greindi hann hins vegar frá því að hann væri til í að flytja frá Íslandi ef hann myndi finna ástina í Póllandi.
„Ég hef ekki farið á stefnumót í langan tíma. Um tíma hætti ég að leita. Ég þvinga mig ekki til neins því það er ekki til neins,“ sagði Ireneusz við hina fertugu hestakonu Agnieszku í þættinum. Viðurkenndi hann að það væri mjög stressandi fyrir hann að koma fram í þættinum. Einnig að hann væri einmana.
Irenusz er 47 ára gamall, 172 sentimetrar á hæð og hefur áhuga á mótorhjólum og teikningu. Sagðist hann meta húmor kvenna, útsjónarsemi og skilning í garð annarra. Virðing fyrir fólki væri lykilatriði. Þegar kemur að útliti sagðist hann vera meira fyrir konur með dökkt hár.
Agnieszka sagðist njóta þess að tala við Irenusz. Hann væri þroskaður, lífsreyndur og svalur gaur sem vissi hvað hann vildi.
Hins vegar kom það á daginn að Irenusz hafði ekki sagt frá því að hann hefði áður tekið þátt í stefnumótaþætti. Taldi hún hann því líklegan til þess að geyma fleiri leyndarmál. Einnig að það hefði vantað eitthvað á milli þeirra.
