Bandaríska leikkonan Jada Pinkett Smith heldur því fram að hinn heimsfrægi löðrungur sem eiginmaður hennar Will Smith rak grínistanum Chris Rock, á Óskarsverðlaunahátíðinni 2022, hafi bjargað hjónabandi þeirra.

Þetta kemur fram í umfjöllun Independent sem vitnar í viðtal sem Jada veitti tímaritinu You.

Þar er haft eftir henni:

„Það munaði litlu að ég yrði ekki viðstödd Óskarsverðlaunahátíðina þetta ár en ég er fegin að ég gerði það. Ég kalla þetta heilaga löðrunginn núna af því hann hafði svo margar jákvæðar afleiðingar.“

Eins og kunnugt er gekk Will Smith upp á svið á hátíðinni og rak Chris Rock löðrung eftir að hann gerði grín að rökuðu höfði eiginkonu hans en hún er haldin sjálofnæmissjúkdómnum alopecia sem veldur m.a. hárlosi.

Hún segir í viðtalinu að þegar fjandinn verði laus eins og gerðist eftir löðrunginn sjái maður virkilega hvar maður sé staddur í lífinu:

„Eftir öll þessi ár þar sem ég var að reyna að komast að niðurstöðu um hvort ég myndi segja skilið við Will þá var það löðrungurinn sem varð til þess að ég uppgötvaði að ég mun aldrei fara frá honum. Hver veit hvar samband okkar væri statt ef þetta hefði ekki gerst.“

Hjónin hafa ekki búið saman síðan 2016 en Jada Pinkett Smith opinberaði það ekki fyrr en í október síðastliðnum. Þau hafa hins vegar verið gift síðan 1997 og veita hvoru öðru enn stuðning opinberlega og tala enn vel hvort um annað. Jada hefur einnig sagt að þau sé skilin að borði og sæng en muni samt verða saman að eilífu.

Miklar sögusagnir hafa gengið undanfarin ár um að Jada og Will séu í opnu hjónabandi og hún er sögð hafa átt í sambandi við söngvarann August Alcina.

Hún neitar því að hjónabandið sé opið og skrifaði á Facebook-síðu sína að hún og Will hafi bæði frelsi til að gera það sem þau vilji af því að þau treysti hvort öðru. Það þýði ekki að sambandið sé opið heldur að um sé að ræða samband tveggja fullorðinna einstaklinga.