Litlasti jakinn (e. The Littlest Yak) er myndrík barnabók fyrir yngsta fólkið okkar, en hún er eftir hinn ástsæla breska barnabókahöfund Lu Fraser. Bókin hefur verið tilnefnd til fjölda verðlauna í Bretlandi. Myndlýsing í bókinni eftir Kate Hindley er mjög skemmtileg. Þýðingin er einnig mjög vönduð, en Sólveig Sif Hreiðarsdóttir þýddi bókina.
Sagan segir frá hinni hugrökku og hrífandi Dísu sem er minnsti jakuxinn í stórri jakuxahjörð sem býr hátt upp í fjöllum Asíu. Þrátt fyrir að Dísa sé fótviss og með þykkan feld þráir hún ekkert meira en að verða stór eins og hinir í hjörðinni. Hún einsetur sér því að verða stór og býr til mikla áætlun til að ná markmiði sínu. Dag einn kemur samt smæð Dísu til hjálpar þegar bjarga þarf pínulitlum jakuxa sem villst hefur af leið og er fastur á mjórri klettasyllu.
Texti Litlasta jakans er grípandi rímsaga með skemmtilegri hrynjandi og dásamleg myndlýsing Kate Hindleys gefur hugmyndafluginu svo sannarlega lausan tauminn. Kver bókaútgáfa gefur út. Litlasti jakinn hentar börnum á leikskólaaldri og upp í fyrsta bekk grunnskóla.
