Ágústa Kolbrún birti mynd af matarkörfunni sinni í vinsæla Facebook-hópnum Mæðra Tips sem í raun kjarnaði áðurnefnda upplifun og létu viðbrögð netverja ekki á sér standa. Hún gaf DV góðfúslegt leyfi til að deila áfram.
„Jæja, ég hef það ekki slæmt en 6019 krónur fyrir þetta?“ sagði hún og birti myndina hér að neðan.
„Við erum fjögur á heimili og ég vil frekar gefa börnunum mínum ávexti heldur en snakk og þetta í millimál! Ég veit að það er kannski hægt að finna ódýrari kost í millimál en er ekki endalaus verið að væla um það hvað við eigum að borða mikið af ávöxtum og grænmeti? Tala nú ekki um þessar blessuðu mjólkurvörur.
Finnst svo þessum blessuðu ráðamönnum skrítið að við séum að fara í skítinn? Guð blessi Ísland segi ég nú bara!“ sagði Ágústa.
Fjölmargar mæður hafa skrifað við færsluna síðastliðna klukkustund og taka undir með Ágústu.
„Jarðarber og bláber eru bara ekki keypt á mínu heimili nema mjög spari því þetta er svo ógeðslega dýrt,“ segir ein og önnur svarar:
„Pælum í því hvað það er sorgleg staðreynd.. ávextir eru að verða lúxusvara! Mangó, jarðarber, bláber, avókadó og svo margt fleira er orðið eitthvað sem maður tímir ekki að kaupa – og kaupir þá frekar eitthvað óhollt.“
„Sexþúsundfokkingkall fyrir nokkrar vörur! Þetta er svo mikil bilun! Og einmitt, það sem maður ætti að borða – holl fæða er svo margfalt dýrari en allar unnu matvörurnar sem er verið að reyna að troða ofan í okkur. Flest sem er til í búðarhillunum er stútfullt af aukaefnum sem við ættum ekki að innbyrða,“ segir ein.
„Ég keypti 2 smjörva og eitt góðostastykki í krónunni og það var 3600 krónur,“ segir önnur.