Flugfélagið PLAY hefur sannarlega slegið í gegn á samfélagsmiðlinum TikTok með skemmtilegum myndböndum. Hátt í tvær milljónir hafa séð nýjasta myndband flugfélagsins á TikTok þar sem áhöfnin reimar á sig dansskóna fyrir neðan myndavél sem hengd var í loftið. Myndbandið er eitt af mörgum sem félagið hefur sent frá sér á TikTok nýverið sem hefur slegið í gegn hjá notendum miðilsins.
@playairlinesPre-flight rituals♬ 오리지널 사운드 – ⚜️관리하는 남자 권기하⚜️
„Í þessu nýjasta myndbandi erum við að fylgja „The Tape-Trend“ sem hefur verið að njóta mikilla vinsælda upp á síðkastið, og fyrirtæki á borð við Aston Martin, GANNI og fjölda NBA liða hafa tekið þátt í,” segir Anna Júlía Magnúsdóttir samfélagsmiðlasérfræðingur PLAY. Trendið svokallaða gengur út á að líma símann við loftið og dansa undir honum.
„Á TikTok trenda ótrúlegustu hlutir og það var frekar fyndið að bera þessa hugmynd upp við áhöfnina. En hún brást vel við henni eins og svo oft áður og gerði þetta alveg svakalega vel.“
Þetta er ekki eina myndbandið sem hefur slegið í gegn hjá flugfélaginu því Anna Júlía hefur náð að plata æðstu stjórnendur félagsins til að taka þátt í markaðssetningu félagsins á TikTok.
Forstjórinn Birgir Jónsson hefur ekki látið sitt eftir liggja eins og sjá má í meðfylgjandi myndbandi.
@playairlinesThey’re important in their own way🥹♬ original sound – Vanessa Sirias
Og þá tók Arnar Már Magnússon, framkvæmdastjóri flugrekstrarsviðs PLAY, það á sig að bregða sér í gervi Tube-girl með eftirminnilegum hætti.
@playairlines He ate tbh😮💨 #tubegirl ♬ original sound – habz.fx
Mörg fyrirtæki hafa í auknum mæli beint sjónum sínum að TikTok þegar kemur að markaðssetningu og segir Anna Júlía það sérlega mikilvægt til að ná til yngri hópa. „Þetta er sá miðill sem er í hraðasta vextinum og skiptir miklu máli að ná góðri fótfestu þar.”
En TikTok er ekki bara vettvangur fyrir dans og glens heldur nýtir flugfélagið þennan vinsæla miðil til að koma upplýsingum á framfæri. Það hefur til að mynda reynst sérlega mikilvægt síðustu vikur til að miðla réttum upplýsingum um jarðhræringarnar á Reykjanesskaga.
@playairlinesState of emergency in Iceland🌋👀 To support residents of Grindavík in these hard times, having to leave their home, please visit raudikrossinn.is♬ original sound – PLAY airlines
„Við höfum séð erlenda TikTok notendur taka ansi stórt til orða um þetta ástand, að Ísland muni jafnvel þurrkast út af kortinu. Það er nauðsynlegt að stemma stigu við slíkri upplýsingaóreiðu því TikTok ásamt öðrum samfélagsmiðlum er sá vettvangur þar sem fólk fær mestar upplýsingar, og því skiptir afar miklu máli að þær séu réttar og endurspegli stöðuna eins og hún er,“ segir Anna Júlía.
