Atvinna bandaríska parsins Randy Santel og Katina DeJarnett er heldur óvenjuleg, en þau eru atvinnumenn í áti og ferðast um heiminn í leit að mataráskorunum á veitingastöðum, til að mynda þar sem í boði er að klára eitthvað ákveðið magn af mat fyrir tilsettan tíma.

Parið kom hingað til lands í byrjun júlí.

Sjá einnig: Atvinnupar í áti leitar að áskorunum á Íslandi

Á meðal þess sem þau tóku sér fyrir hendur var áskorun sem 2Guys stóð fyrir í Reykjavík. Hafþór Júlíus Björnsson, Fjallið, tókst á við áskorunina með parinu um að borða sex mismunandi hamborgara af matseðli 2Guys. Höfðu þau 45 mínútur til að klára matinn, en hamborgararnir vógu samtals um 2 kíló per mann og voru þeir bornir fram með 500 grömmum af „Dirty Fries“ hlaðinni ostasósu auk beikonbita.

„Við vorum hvort um sig að reyna að vinna okkar 90 dala íslenska ostborgaramáltíðir ókeypis ásamt sætum stuttermabolum og stað á frægðarvegg 2Guys (e. Wall of Fame),“ segir parið. „Miklar þakkir til Hjalta eiganda og allra hjá 2Guys í miðbæ Reykjavíkur fyrir frábæran mat, drykki, bjór og gestrisni!! Sérstakar þakkir líka til allra frábæru vina okkar sem komu á þriðjudagseftirmiðdegi til að horfa á og hitta okkur!! Við þökkum öllum í Reykjavík og á eyjunni Íslandi sem horfa á myndböndin og styðja allt okkar erfiði!! Næstu myndbönd munu innihalda belgískar veitingaáskoranir um allt hið frábæra land Belgíu og ég vona að þið njótið þeirra öll!!“

Randy er með tæplega 1,7 milljónir fylgjenda á YouTube-síðu sinni en Katina tæplega 700 þúsund. Má því með sanni segja að Randy og Katina séu sannkallaðar „áthrifavaldar“.