Danska konungsfjölskyldan hefur verið í hringiðu skandals undanfarna daga eftir að Friðrik krónprins rataði í heimsfréttirnar fyrir stefnumót hans með mexíkósku leikkonunni Genoveva Casanova.
Friðrik er erfingi dönsku krúnunnar. Hann hefur verið giftur hinni áströlsku Mary Donaldson í næstum tvo áratugi og eiga þau saman fjögur börn.
Spænska tímaritið Lecturas birti myndir af Friðrik mæta á Pablo Picasso sýningu í Madríd með Casanova upp á arminn. Tímaritið birti einnig myndir af þeim á rölti um borgina í lok október.
Genoveva Casanova y Federico de Dinamarca juntos en Madrid ¡Las fotos de las que todos hablan! #ExclusivaLecturas https://t.co/cj5bEa3PeH
— Lecturas (@Lecturas) November 9, 2023
Casanova hefur þvertekið að um framhjáhald sé að ræða og hefur gefið til kynna að hún er að íhuga að lögsækja blaðið.
Lecturas virðist sannfært og hefur birt fleiri upplýsingar um meint stefnumót krónprinsins og leikkonunnar.
Samkvæmt miðlinum fór parið í rómantíska gönguferð um El Retiro Park eftir sýninguna. Þau fóru síðan, að sögn tímaritsins, í íbúð hennar, en í sitthvoru lagi. Þau yfirgáfu síðan bygginguna – aftur í sitthvoru lagi – en fóru í sama bíl. Bæði höfðu skipt um föt.
Þau fóru á spænska veitingastaðinn El Corral de la Moreria þar sem þau horfðu á flamenco-dansara. Sýningin var til miðnættis en samkvæmt Lecturas voru þau á staðnum til eitt og yfirgáfu staðinn saman og eyddu nóttinni saman.
Næsta dag fór Friðrik aftur til Danmerkur.
Mary prinsessa sýndi eiginmanninum stuðning á miðvikudaginn eftir að fyrsta fréttin um meint framhjáhald hans birtist í Lecturas. Þau tóku á móti spænsku konungshjónunum Don Felipe og Doña Letizia í Kaupmannahöfn. Að sögn Lecturas hafði fólk á vegum Letizia samband við miðillinn til að athuga hvort að sagan reyndist sönn. Spænska tímaritið heldur því fram að Felipe Spánarkonungur og Letizia Spánardrottning vilji halda sig langt í burtu frá skandalnum sem þegar hefur varpað skugga á heimsókn þeirra til Danmerkur.
Eins og fyrr segir hafnar Casanova öllum ásökunum um framhjáhald.
„Ég neita að eitthvað rómantískt sé á milli mín og Friðriks krónprins. Staðhæfingar af þessu tagi eru ekki aðeins ósannar með öllu heldur brengla þær sannleikann á illgjarnan hátt,“ sagði hún við spænska miðilinn Hola!
Hún sagðist hafa farið með krónprinsinum á sýninguna eftir að kunningi hans hætti við og hann hafi beðið hana um að koma með sér í staðinn. Heimildarmenn nátengdir Casanova segja að þau séu einfaldlega „gamlir vinir“ sem þekkja mikið af sama fólkinu.
Casanova er vel þekkt nafn í Mexíkó og hún er einnig fræg á Spáni, þar sem hún er búsett. Hún hefur komið fram í mörgum spænskum raunveruleikaþáttum, eins og The Masked Singer, Spanish Celebrity MasterChef og The Chase.
Hún giftist Cayetano martines de Irujo árið 2005, hann er í dag greifi af Salvatierra og hertogi af Arjona á Spáni. Þau eiga saman tvíburana Luis og Amine, 23 ára. Þau skildu árið 2008.
Friðrik krónprins hefur ekki tjáð sig um orðróminn að svo stöddu.
