Hanna Rún var gestur í Fókus, spjallþætti DV. Horfðu á allan þáttinn hér.
Hanna Rún fann sína köllun snemma. Hún byrjaði að æfa dans aðeins fjögurra ára gömul og vissi strax að það væri ekki aftur snúið. Síðan þá hefur hún landað hverjum titlinum á fætur öðrum og er í dag með fremstu samkvæmisdönsurum í heimi.
Hún kom heim fyrir stuttu frá Þýskalandi þar sem hún og eiginmaður hennar, Nikita Bazev, kepptu á Evrópumeistaramótinu og lentu í fimmta sæti.
Hanna Rún keppti í fallegum rauðum kjól með skrautsteinum í tugþúsundatali. Hún skreytti kjólinn sjálf og er hann aðeins einn af mörgum sem hún hefur gert fyrir sjálfa sig og aðra.
„Ég er ekki að taka tímann þegar ég er að gera kjólana mína og dóttir mín er rosalega dugleg að hjálpa mér. Við föndrum mikið heima,“ segir Hanna og bætir við að hún hefur haft gaman af því að föndra síðan hún var lítil.
„Dóttir mín er þriggja ára og síðustu fjórir kjólar sem ég hef saumað og skreytt, hefur hún skreytt með mér. Maður er ekkert að telja hvað fara margir þúsund steinar eða hvað þetta tekur langan tíma, en ég hef alveg verið yfir 300 klukkutíma að gera kjól.“
Það eru ekki aðeins kjólarnir sem taka tíma. Móðir Hönnu og systir hennar sáu um að skreyta skyrtu Nikita þegar Hanna Rún fattaði að hún hefði ekki tíma til að sjá um föt þeirra beggja.
„Þær voru rúmlega 60 klukkutíma saman að steina skyrtuna hans. Fóru alveg 20 þúsund og eitthvað steinar,“ segir hún.
Hún segir nánar frá kjólagerðinni í spilaranum hér að ofan.
Fylgstu með Hönnu Rún á Instagram.
View this post on Instagram
