Leikurinn gengur út á að ná sem flestum dagatölum, sem falla niður skjáinn ásamt grámyglulegum sokkum, í poka innan ákveðins tímaramma, þú færð 10 stig fyrir hvert dagatal en missir 30 stig ef sokkur fer ofan í pokann.
Þátttakendur virðast eiga erfitt með að ná yfir 350-400 stig og skilja ekkert hvernig sumir ná yfir 600. Í samtali við DV segir Gerður Huld Arinbjarnardóttir, eigandi Blush, að fólk hefur hringt í verslun Blush, sent fyrirtækinu tölvupóst og skilaboð á Instagram, til að spyrja: „Hvernig í andskotanum nær fólk meira en 600 stig, ég næ alltaf hámark 350.“
Leikurinn var einnig til umræðu í vinsæla Facebook-hópnum Beauty Tips þar sem meðlimir veltu fyrir sér hvort hann væri „bull leikur.“
„Er einhver hérna sem er líka að spila leikinn hjá Blush en það er ekki sjéns að ná meira en 330 stig en 3 efstu ná alveg i 780?? Hvað er í gangi?“
Fjöldi kvenna hafa skrifað við færsluna og hafa sömu söguna að segja:
„Ég hef aldrei komist yfir 330, hef náð þvi svona 4 sinnum í röð.“
Gerður deildi þá með þeim trixinu á bak við háan stigafjölda.
„Ég get staðfest að það er hægt að ná yfir 700 og þeir sem eru efstir á stigatöflunni eru raunverulegir keppendur sem eru ekki tengdir Blush,“ sagði Gerður hlæjandi.
Hún útskýrði síðan trixið. „Þegar maður nær sokk þá koma dagatöl hraðar og fleiri niður í einu.“
Þau sem skipa þrjú efstu sætin eftir að leik er lokið vinna jóldadagatal Blush. Það er hægt að spila eins oft og maður vill út sunnudaginn 15. október.
Sá sem er í fyrsta sæti þessa stundina er með 810 stig.
