Fyrirsætan Irina Shayk, fyrrverandi unnusta og barnsmóðir stórleikarans Bradley Cooper, er allt annað en ánægð með samband leikarans við fyrirsætuna Gigi Hadid en þau hafa verið að slá sér upp saman síðustu misseri. „Irina er ekki ánægð með að nýja kærastan sé mun yngri ofurfyrirsæta,“ segir viðmælandi Page Six sem segir að ráðahagurinn hafi komið Irinu í opna skjöldu.
Irina, sem áður var kærasta fótboltakappans Cristiano Ronaldo, og Bradley hófu ástarsamband sitt árið 2015 en sambandinu lauk formlega árið 2019 þó að stundum hafi borist fregnir að því að þau hafi verið að stinga saman nefjum aftur. Vinátta þeirra er sögð náin og til að mynda hafa þau reglulega farið í frí saman með barnungum syni sínum.
Aðili kunnugur Shayk segir Page Six að fyrirsætan hafi vonast til þess að hún og Cooper myndu hreinlega taka saman aftur og því hafi samband hans við Hadid, sem er 28 ára og tæpum áratug yngri en Shayk, valdið henni hugarangri.
Shayk var í sumar orðuð við NFL-stjörnuna Tom Brady en ástarsambandið fjaraði hratt út.
