Það hefur ekki farið framhjá mörgum að söngkonan Britney Spears er að gefa út ævisögu sína. Bókin kemur út þann 24. október næstkomandi en fjölmiðlar vestanhafs hafa fjallað um hverja bombuna á eftir annarri úr bókinni. Til dæmis um þungarrof sem Britney fór í þegar hún var á föstu með söngvaranum Justin Timberlake og hvers konar fíkniefni voru í uppáhaldi hjá henni þegar hún djammaði sem mest.

Sjá einnig: Önnur bomba frá Britney – Viðurkennir framhjáhald og staðfestir að Justin hafi hætt með henni á ósmekklegan máta

Í bókinni opnar Britney sig um umdeilt viðtal og segir að það hafi markað ákveðin tímamót í lífi hennar og leitt hana niður dimma braut.

Fjölmiðlakonan Diane Sawyer tók umrætt viðtal við söngkonuna árið 2003. Í dag er viðtalið, sem og hegðun Sawyer, verulega umdeilt. Fjölmiðlakonan spurði fjölda nærgöngulla og óviðeigandi spurninga, meðal annars um nýleg sambandsslit Britney og Justin Timberlake. Aðdáendur hafa líkt viðtalinu við yfirheyrslu.

„Veistu, ef ég fengi tækifæri til að skjóta Britney Spears, þá myndi ég gera það“

„Þetta var niðurlægjandi,“ segir Britney um viðtalið í bókinni.

Söngkonan var á þeim tíma aðeins 21 árs. „Ég fékk ekki að vita spurningarnar fyrir fram og þær voru niðurlægjandi. Ég var líka á allt of viðkvæmum stað á þessum tíma til að fara í svona viðtal.“

„Ég vildi ekki deila einhverju persónulegu með heiminum. Ég skuldaði ekki fjölmiðlum að deila smáatriðum um sambandsslitin. Þau hefðu ekki átt að neyða mig að tala um þetta í sjónvarpinu, neydd til að gráta fyrir framan þessa ókunnugu konu.“

Eitt af mest sjokkerandi augnablikum viðtalsins var þegar Sawyer sýndi Britney myndband af þáverandi eiginkonu ríkisstjóra Maryland segja: „Veistu, ef ég fengi tækifæri til að skjóta Britney Spears, þá myndi ég gera það.“

Britney var í áfalli að sjá þetta en Sawyer tók upp hanskann fyrir eiginkonu ríkisstjórans.

Markaði tímamót

Söngkonan segir að þetta viðtal hafi markað ákveðin tímamót í lífi hennar og leitt hana að dimmu brautinni sem heimurinn fylgdist æstur með henni fara niður.

„Þetta viðtal braut mig, það var eins og það hafi verið slökkt á einhverju. Ég fann eitthvað koma yfir mig, einhverja neikvæða orku og ég fann mig breytast, næstum eins og í varúlf, í vonda manneskju.“

Þrátt fyrir alla gagnrýnina hefur Sawyer hvorki beðist afsökunar né tjáð sig opinberlega um málið.

Horfðu á viðtalið hér að neðan.