Raechelle var með 1,4 milljónir fylgjenda á Instagram og veitti fjölmörgum einstaklingum innblástur með myndböndum sínum og færslum.
Raechelle keppti meðal annars í fitness en sjálf var hún einstæð móðir og veitti hún fylgjendum sínum innsýn í krefjandi líf sitt. Hún starfaði meðal annars sem fyrirsæta og þá var hún með fyrirtæki þar sem hún tók skjólstæðinga sem vildu koma sér í betra form í fjarþjálfun.
Raechelle var þekkt í Nýja-Sjálandi enda varð hún fyrsta konan þaðan til að taka þátt í hinni virtu keppni Olympia sem fram fer í Bandaríkjunum.
„Hún studdi okkur ávallt og gat alltaf gefið okkur góð ráð,“ segir elsta dóttir hennar, Anna Chase.
Raechelle eignaðist börnin fimm með fyrrverandi eiginmanni sínum, Chris Chase, en þau skildu árið 2015. Hann var síðar dæmdur í tíu ára fangelsi fyrir fíkniefnamisferli.
Eftir skilnaðinn skrifaði hún grein í tímaritið Stuff þar sem hún hvatti konur sem eru í eitruðum samböndum að hafa sig á brott. Segist hún hafa öðlast meira sjálfstraust eftir að hún hætti í sínu sambandi og það hafi reynst hárrétt ákvörðun á sínum tíma.
Dánarorsök liggur ekki fyrir fyrr en eftir að krufning hefur farið fram.
