Segir íslensk kona um hvernig hún hafi fjármagnað neysluna. Hún segir sögu sína í þættinum Lífið á biðlista. Gunnar Ingi Valgeirsson kom af stað samnefndu átaki fyrir stuttu og er þetta annað viðtalið í herferð hans gegn löngum biðlistum í meðferð og afvötnun.
Í þættinum ræðir hann við konu sem hann kallar X.
„Ég var bara komin í krakkneyslu og var líka eitthvað að reykja oxy,“ segir hún um neysluna.
„Það var eiginlega þannig, eins og í síðasta sinn sem ég fór á Vog var ég búin að hringja mjög mikið og það var ótrúlega langur biðlisti. Það var einhvern veginn enginn séns að koma mér inn á stuttum tíma. Eins og foreldrar mínir voru að reyna að hringja eins og þeir gátu og vinnuveitandi foreldra minna var líka að pressa á það. Á þeim tíma gat ég ekki hætt, það var ekki séns fyrir mig að hætta. Ég reyndi að vera edrú en fíknin var sterkari.“
X segir að hún hafi verið komin á botninn. „Ég var einhvers staðar og síðan fékk ég að fara heim til foreldra minna og sofa, kannski borða eitthvað og fara í sturtu og svo var ég farin út aftur,“ segir hún.
„Það var oft reynt að setja mér einhver mörk en ég átti mjög meðvirka foreldra sem leyfðu mér að koma. Þetta var orðið ógeðslegt og tilfinningin að vita ekki hvar þú ert að fara að sofa í kvöld er mjög ógnvekjandi.“
Konan segir að hún hafi verið farin að fjármagna neysluna með því að stela frá fjölskyldu sinni og selja sig. „Það er furðulegt að líta til baka og sjá hvernig maður var því ég tengi lítið sem ekkert við þessa mannaeskju. Það verður svo rosalega mikið persónuleikabreyting. Ég á ekkert sameiginlegt með þessari manneskju í dag. Þetta gjörbreytti mér og bara öllum mínum viðhorfum, gildum og siðferði. Skaðinn sem ég olli mínu nánasta fólki er gífurlegur.“
Horfðu á þáttinn hér að neðan.