Söngkonan Britney Spears er komin með nóg eftir að lögregla vitjaði hennar á dögunum eftir að hafa borist ótal símtöl þar sem söngkonan var sögð í ójafnvægi. Málið má rekja til myndbands sem Britney birti á Instagram þar sem hún dansaði haldandi á tveimur stórum eldhúshnífum.

Lögregla gerði það sem kallast „velferðar-athugunum“ eða wellness check eins og það heitir í Bandaríkjunum. Fólst það í því að lögreglumenn bönkuðu upp á til að staðfesta að söngkonan væri ekki í hættu frá sjálfri sér eða öðrum.

„Er þetta aftur orðinn brandari í fjölmiðlum, þessi velferðar-athugun? Látið ekki svona Ameríka. Við erum betri en þetta, er það ekki? Lögreglan kom að heimili mínu og sagðist ekki ætla að fara fyrr en þeir hefðu fengið að tala við mig,“ skrifaði Britney á Instagram í gær.

Hún tók fram að hún eigi von á afsökunarbeiðni en tók þó ekki fram hvort það séu aðstandendur hennar eða lögregla sem ætli að biðja hana fyrirgefningar.

„Ég hef verið lögð í einelti á heimili mínu alltof lengi. Nú er nóg komið. Við skulum ekki ræða málin heldur gera eitthvað í þeim. Nú er mamma mín að neita að tjá sig við blaðamenn þegar þeir spyrja hana um mig, eins og ég hafi gert eitthvað rangt. Neibb þetta er gamalt leikrit. Fólk þarf að taka ábyrgð á gjörðum sínum.“

Hvað afskipti lögreglu varðar segir söngkonan að þau snúist um vald. Þeir haldi því fram að þeir hafi fengið símtal frá aðstandanda sem hafði virkilegar áhyggjur af andlegri heilsu söngkonunnar. Lögregla hafi rætt við öryggislið Britney, en ekki verið hleypt inn á heimilið og að svo búnu snúið til baka.

Britney tók fram að hnífarnir hafi verið leikmunir sem hún hafi leigt í leikmunabúð. Hún hafi hreinlega verið að herma eftir annarri tónlistarkonu, Shakira, og flutningi hennar á MTV-verðlaununum í september.