„Ég er nefnilega alveg búinn að greina mína líðan með þetta. Mér finnst þetta frábært, mér líður eins og afa en ekki Nylon pabba í þessari umferð,“ segir Einar Bárðarson og skellihlær, þegar stelpurnar í Nylon spyrja hann hvernig honum líði með endurkomu þeirra. Á blómatíma Nylon flokksins var hann oft kallaður Nylon pabbi. “Nú er mér boðið í afmælin ég þarf ekki að halda þau,” segir hann máli sínu til stuðnings.
Þar vísar Einar til þess að stelpurnar eru í dag meðal fremstu lagahöfunda og umboðsmanna landsins og þurfi lítið á hans aðstoð að halda. Hann hafi kennt þeim allt sem hann kunni og í dag séu þær að gera hlutina betur en hann hefði þorað að vona sjálfur fyrir þeirra hönd.
“Þannig að fyrir mér er það bara einstök tilfinning að fá að fylgjast með ykkur framkvæma þetta svona fagmannlega. Fá bara að dást að ykkur úr fjarlægð, en eins og ég segi, ég fæ að koma í afmælið en þarf ekki að halda það.”
Sjá einnig: Grátandi á æfingum í nostalgíukasti – „Sumt fólk elskaði að hata okkur“
Nylon stelpurnar rifja upp minningar af gullárum Nylon í hlaðvarpsþætti Einars, Einmitt. Útkoman er stórskemmtileg sögustund með þeim þar sem þau þvælast á milli minninganna allt frá prufunum vorið 2004 að endalausum ferðum þeirra um Bretlandseyjar.
Eins og margir vita stofnaði Einar til áheyrnaprófa árið 2004 og úr varð Nylon flokkurinn og restina af þeirri sögu þekkja flestir landsmenn. Á Tónaflóði Rásar 2 á menningarnótt 19. ágúst komu stelpurnar óvænt saman aftur en þær höfðu ekki gert það síðan á fyrri hluta ársins 2008 þegar Emilía Björg Óskarsdóttir kvaddi samstarfið.
Um fátt meira talað en Nylon síðustu vikur
Það er skemmst frá því að segja að um fátt var meira rætt í kjölfar Menningarnætur en þessa óvæntu endurkomu Nylon flokksins og lög flokksins, bæði eitt glænýtt og þau eldri, eru nú sjáanleg á spilanalistum útvarpsstöðvanna og spilunarlistum Spotify.
Kvaddi stelpur en hitti konur í sumar
Þá nefnir Einar það líka að þegar hann hitti stelpurnar fjórar saman aftur á æfingu rétt fyrir tónleikana hafi hann áttað sig á því þá hvað þær hefðu þroskast mikið sem listakonur, fagmenn og einstaklingar. “Ég fann það svo sterkt á æfingunni, hafandi ekki verið með ykkur í sama herbergi í næstum 16 ár að þegar ég var síðast í herbergi með ykkur öllum voruð þið stelpur en á þessari æfingu var ég með konum á æfingu.”
Einar er ekki spar á lofið á þessar fyrrum samstarfskonur sínar og það má greina mikla virðingu og kærleika á milli þeirra í þessu samtali. Nylon stúlkurnar vildu þó ekkert segja um næstu skref eða yfirhöfuð gefa til kynna að það séu næstu skref en hlusta má á stórskemmtilegt samtal þeirra í Einmitt.
