Tónlistarkonan Lizzo hefur staðið í ströngu eftir að þrír fyrrum dansarar hennar höfðuðu mál gegn henni í byrjun ágúst þar sem dansararnir saka hana um kynferðislega áreitni, þyngdarsmánun og fyrir að skapa fjandsamlegt vinnuumhverfi. Nokkrum dögum síðar greindu lögmenn kvennanna þriggja frá því að minnst sex til viðbótar hafi sett sig í samband við þá með ásakanir í garð tónlistarkonunnar.
Lizzo svaraði fyrir sig með langri yfirlýsingu á Instagram, en nú hefur hún ráðið lögfræðinginn Marty Singer og hyggst höfða mál á hendur dönsurunum, þeim Crystal Williams, Noelle Rodriguez og Arianna Davis.
Í málssókn dansaranna segir meðal annars að þeir hafi orðið fyrir áfalli við heimsókn á klúbb í París í Frakklandi sem Lizzo bauð þeim á svo „þeir gætu lært eitthvað eða fengið innblástur af frammistöðunni“, en söngkonan greindi þeim ekki frá að um nektarkabarettstað væri að ræða. Sögðu dansararnir að þeir hefðu þannig ekki átt kost á að taka sjálfstæða ákvörðun um hvort þeir vildu taka þátt í kvöldinu eða ekki.
Lögfræðingur Lizzo hefur nú greint frá því að þær hafi undir sönnunargögn frá þessu kvöldi ljósmyndir sem sýni að dansararnir hafi svo sannarlega ekki verið í áfalli á klúbbnum, myndirnar sýni þvert á móti að þeir hafi skemmt sér konunglega baksviðs með skemmtikröftum staðarins.
„Eins og gamla orðatiltækið segir, mynd segir meira en þúsund orð,“ segir Singer. „Myndirnar af dönsurunum þremur sem eru hæstánægðir baksviðs með skemmtikröftum klúbbsins tala sínu máli. Lizzo ætlar að höfða mál fyrir ærumeiðingar þegar hún hefur náð sigri og þessum hræðilegu kærum gegn henni verið vísað frá.“
Neama Rahmani, lögmaður dansaranna, segir eðlilegt að séu brosandi á myndunum, þeir hafi einfaldlega viljað halda vinnunni. „Við höfum fjallað um öll þessi tilvik þar sem stefnendur virðast vera ánægðir með Lizzo meðan þeir starfa með henni. Auðvitað vildu þeir halda vinnunni sinni. Þeir þurftu að greiða reikninga eins og allir aðrir en fengu loksins nóg
Arianna, Noelle og Crystal voru nógu hugrakkar til að koma fram með reynslu sína og ætla ekki að draga mál sitt tilbaka vegna þessara eineltisaðferða lögmanns Lizzo. Okkar skjólstæðingar eru staðfastir og hlakka til að eiga sitt dag fyrir dómi.“
Hann bætti við að myndirnar „breyti engu um staðreyndir í málsókninni“.
Lizzo hefur frá upphafi neitað harðlega öllum ásökunum í sinn garð. „Vinnusiðferði mitt, siðferði og virðing hefur verið dregið í efa. Persóna mín hefur sætt gagnrýni. Þessar ásakanir koma frá fyrrverandi starfsmönnum sem hafa þegar viðurkennt opinberlega að þeim hafi verið sagt að hegðun þeirra á tónleikaferðalaginu hafi verið óviðeigandi og ófagmannleg.“
