Lögmenn þriggja kvenna sem störfuðu sem dansarar fyrir tónlistarkonuna Lizzo, segja að minnst sex til viðbótar hafi sett sig í samband við þau með ásakanir í garð tónlistarkonunnar.

Málið hefur vakið mikla athygli seinustu vikuna en Lizzo, sem er þekkt fyrir að berjast fyrir líkamsvirðingu, var meðal annars sökuð um fitusmánum, kynferðislega áreitni og að hafa staðið fyrir eitraðri vinnustaðamenningu. Tónlistarkonan hefur þverneitað þessum ásökunum sem hún segir engan fót vera fyrir.

Ron Zambrano er lögmaður kvennanna þriggja og sagði við NBC fréttastofuna að nú hafi sex ásakanir borist til viðbótar frá aðilum sem hafi verið með Lizzo á tónleikaferðalögum. Ýmist hafi þessir einstaklingar verið dansarar eða verið hluti af svokallaðri Amazon sýningu sem söngkonan stóð fyrir. Þessar ásakanir greini frá eitraðri vinnustaðamenningu þar sem loftið hafi verið rafmagnað af kynferðislegri spennu. Eins hafi tónlistarkonan í sumum tilvikum ekki staðið skil á greiðslum til starfsmanna.

Konurnar greindu meðal annars frá því að Lizzo hafi hótað þeim og verið ógnandi í framkomu. Þær hafi upplifað að ekki mætti bera neinar athugasemdir á borð öðruvísi en að eiga von á viðurlögum. Þær hafi eins verið þvingaðar til að taka þátt í nektarsýningum og koma fram á kynlífsklúbbum þrátt fyrir að það væri þeim þvert um geð.

Lizzo hefur borið því við að um sé að ræða deilur sem megi rekja til óánægju með starfslok hjá henni. Hafi þessar konur ákveðið að vega að henni með fölskum ásökunum og varpa þar með rýrð á orðspor hennar og allt sem hún standi fyrir.

Dansararnir hafa höfðað mál gegn Lizzu þar sem þær fara fram á miskabætur.