Hertogaynjan af Sussex, Meghan Markle, varð 42 í gær, 4. ágúst. Markle hóf afmælisfögnuðinn snemma og á mánudag fór hún með Portia De Rossi og fleiri vinkonum að sjá kvikmyndina Barbie í Santa Barbara í Kaliforníu. Vinkonuhópurinn færði sig síðan yfir á San Ysidro Ranch hótelið og greinir PageSix frá því að hópur vinkvenna hafi þar verið í gæsun og gekk Markle að brúðinni, óskaði henni til hamingju og sat fyrir á myndum með hópnum. 

Þó Harry hafi setið heima þetta kvöld, líklega að passa börnin, fóru hjónakornin út að borða á miðvikudag á veitingastaðnum vinsæla Tre Lune í Montecito. Afmælisdagurinn sjálfur var svo tekinn rólega heima með fjölskyldunni. 

Framundan hjá Harry er ferð til Japan á miðvikudag þar sem hann mun verða viðstaddur ISPS Sports Values Summit-Special Edition íþróttaleikana í Tokyo. Óljóst er hvort Markle mun fara með honum, en staðfest er að hjónin ætla að mæta saman á Invictus leikana í Düsseldorf í Þýskalandi í september.