Eins og fjölmiðlar greindu frá í gær hafa þrír fyrrverandi dansarar söngkonunnar Lizzo höfðað mál gegn henni þar sem þeir saka söngkonuna um kynferðislega áreitni, þyngdarsmánun og fyrir að skapa fjandsamlegt vinnuumhverfi.
Sjá einnig: Lizzo kærð fyrir meinta kynferðislega áreitni og þyngdarsmánun
Söngkonan hefur nú tjáð sig um málið og í yfirlýsingu sem hún birti á Instagram fyrr í dag segir hún síðustu daga hafa verið einstaklega erfiða og valdið henni yfirþyrmandi vonbrigðum.
„Vinnusiðferði mitt, siðferði og virðing hefur verið dregið í efa. Persóna mín hefur sætt gagnrýni,“ segir Lizzo. Segist hún vanalega ekki bregðast við fölskum ásökunum, en ásakanir fyrrum dansara hennar séu eins ótrúverðar og þær hljómi og svo svívirðilegar að hún geti ekki sleppt því að svara fyrir sig.
Segir hún sögurnar koma frá fyrrverandi starfsmönnum sem hafi „þegar viðurkennt opinberlega að þeim hafi verið sagt að hegðun þeirra á tónleikaferðalaginu hafi verið óviðeigandi og ófagmannleg.“
Segist Lizzo sem listamaður alltaf hafa haft mikla ástríðu fyrir starfinu. „Ég tek tónlistina mína og framkomu mína alvarlega af því í lok dags þá vil ég aðeins færa fram bestu listina fyrir mig og aðdáendur mína. Ástríðu fylgir mikil vinna og miklar kröfur. Sundum þarf ég að taka erfiðar ákvarðanir en það er aldrei ætlun mín að láta einhverjum líða óþægilega eða finnast þeir ekki metnir að verðleikum sem mikilvægur hluti af teymi mínu.“
Segir söngkonan að hún vilji ekki að fólk líti á hana sem fórnarlamb, en hún sé heldur ekki illmennið sem fólk og fjölmiðlar hafi málað hana upp sem síðustu daga. Segist hún opinská með kynhneigð sína og tjáningu, en neiti að viðurkenna eða leyfa fólki að nota það til að láta hana líta út fyrir að vera aðra en hún er.
„Ég tek ekkert alvarlegra en þá virðingu sem við konur eigum skilið. Ég veit hvað það er að vera líkamssmánuð daglega og myndi aldrei gagnrýna eða reka starfsmann vegna líkamsþyngdar viðkomandi.
Ég er særð en ég mun ekki láta þetta skyggja á það góða sem ég hef gert í þessum heimi. Ég vil þakka öllum sem hafa haft samband og stutt mig á þessum erfiða tíma.“
